ԱՄՆ նախագահ Ջո Բայդենը Ազգային անվտանգության խորհրդին հանձնարարել է զգուշացնել Իրանին, որ ԱՄՆ նախկին առաջնորդ Դոնալդ Թրամփի նկատմամբ ցանկացած մահափորձ Վաշինգտոնը կդիտի որպես պատերազմ հայտարարելու ակտ՝ գրում է The Washington Post-ը։

Ազգային անվտանգության խորհրդի խոսնակ Շոն Սավեթն հայտնել է, որ Բայդենը հրահանգել է «բոլոր ռեսուրսներն» ուղղել պաշտպանելու Թրամփին: Հետախուզական գործակալություններին հանձնարարված է տեղեկատվություն տրամադրել ԱՄՆ նախկին նախագահին և նրա անվտանգության ծառայությանը սպառնալիքների մասին։

The Washington Post-ը նաեւ գրում է, որ Թրամփի նախընտրական շտաբը դիմել է Գաղտնի ծառայությանը՝ ուժեղացնելու ԱՄՆ 45-րդ նախագահի անվտանգության միջոցառումները, որոնց թվում է Հանրապետական կուսակցության թեկնածուին թռիչքների համար ռազմական ինքնաթիռների տրամադրումը։

Գաղտնի ծառայության խոսնակը Թրամփի պաշտպանության մակարդակն անվանել է «ամենաբարձրը»: «Պաշտպանության նախարարությունը պարբերաբար պաշտպանական օգնություն է տրամադրում նախկին նախագահին, ներառյալ պայթուցիկ առարկաների ոչնչացումը, կինոլոգիական ստորաբաժանումներն ու օդային փոխադրումները»,- ասել է խոսնակը:

Գաղտնի ծառայությունը նաև թռիչքների ժամանակավոր սահմանափակումներ է մտցնում «նախկին նախագահի նստավայրի վրայով և նրա ճանապարհորդությունների ընթացքում»: «Բացի դրանից՝ նախկին նախագահը ստանում է տեխնիկական անվտանգության ամենաբարձր սարքավորումները»,- հավելել է խոսնակը։