Առաջարկվում է 2020 թվականի սեպտեմբերի 27-ին սանձազերծված ռազմական գործողությունների հանգամանքների ուսումնասիրման նպատակով ստեղծված Ազգային ժողովի քննիչ հանձնաժողովի գործունեության ժամկետը երկարաձգել եւս վեց ամսով:

Քննիչ հանձնաժողովի նախագահ, Պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանը ներկայացրել է հանձնաժողովի գործունեությունը. հանձնաժողովը պահանջել եւ ստացել է 4154 գաղտնի եւ հույժ գաղտնի տեքստային ու գրաֆիկական փաստաթուղթ` 14.000 էջից ավելի ծավալով, որոնք դեռեւս մանրակրկիտ ուսումնասիրվում են հանձնաժողովի պատգամավորների եւ փորձագետների կողմից: Հրավիրվել եւ հրավիրվում են գործող ու նախկին զինվորական եւ քաղաքական բարձրաստիճան պաշտոնյաներ: Հանձնաժողով են դիմել պատերազմի բազմաթիվ մասնակիցներ, զոհվածների հարազատներ, որոնք եւս հանձնաժողովին են ներկայացնում բազմաթիվ տեղեկություններ եւ տեսաձայնային նյութեր: Անդրանիկ Քոչարյանի խոսքով լրացուցիչ ուսումնասիրման նպատակով համապատասխան կառույցներին դիմելու, նոր փաստաթղթեր ստանալու եւ ուսումնասիրելու անհրաժեշտություն է առաջացել: Դրանով պայմանավորված էլ առաջարկվում է երկարաձգել հանձնաժողովի գործունեությունը:

ԱԺ պատգամավորներ Գեղամ Նազարյանը, Արփինե Դավոյանը, Վահագն Ալեքսանյանը եւ Արծվիկ Մինասյանը խոսել են հանձնաժողովի գործունեության եւ դրա արդյունավետության մասին: Անդրադարձ է եղել հանձնաժողովի աշխատանքներին ընդդիմության մասնակցության հարցին:

Ներկայացնելով «Հայաստան» խմբակցության տեսակետը` Արծվիկ Մինասյանը կարծիք է հայտնել, որ ԱԺ պաշտպանության եւ անվտանգության հարցերի մշտական հանձնաժողովը չի կարող այս խնդիրները պարզաբանել եւ ներկայացրել է հիմնավորումներ: Քննիչ հանձնաժողովը պետք է ուսումնասիրի Հայաստանի ներկա քաղաքական իշխանության կառավարման շրջանում տեղի ունեցած պատերազմը, մինչդեռ քննիչ հանձնաժողովը ներկայումս ղեկավարում է քաղաքական իշխանության ներկայացուցիչը: Ըստ նրա` առկա է շահերի բախում, հանձնաժողովն իր ծանրաբեռնվածությամբ, նյութական եւ մարդկային ռեսուրսներով չի կարող պատշաճ իրականացնել այդ ծավալի աշխատանքը: Արծվիկ Մինասյանը հանձնաժողովի աշխատանքներին խորհրդարանի կառավարող եւ ընդդիմադիր ուժերի մասնակցությունից բացի կարեւորել է Արցախի ներկայացուցիչների, ՄԻՊ-ի, արտախորհրդարանական քաղաքական ուժերի ներգրավվածությունը: Պատգամավորի համոզմամբ այս ժամանակահատվածն անբավարար է լինելու հարցերի պատասխանները ստանալու համար, ուստի խմբակցությունը դեմ է ժամկետի երկարաձգմանը:

Եզրափակիչ ելույթում եւ ԱԺ «Քաղաքացիական պայմանագիր» խմբակցության տեսակետը ներկայացնելիս Անդրանիկ Քոչարյանը հիշեցրել է, որ նման մեխանիզմ կիրառվել է նաեւ մարտի մեկի դեպքերի ուսումնասիրման ժամանակ: «Ինչո՞վ ավարտվեց. առաջին զեկույցից հետո իշխանությունը ներկայացնող փորձագետներն անհետացան, ես եւ տիկին Սաֆարյանը շարունակեցինք եւս չորս զեկույց ներկայացնել, որոնք շատ կարեւոր, փաստարկված նյութեր էին պարունակում եւ հետագայում ներառվեցին նաեւ քննչական մարմինների կողմից այդ գործը քննելու ժամանակ: Դա անկախ մարմնի մասով»,- Արծվիկ Մինասյանի հիմնավորումներին անդրադառնալով՝ նշել է հանձնաժողովի նախագահը:

Համաձայնելով Արծվիկ Մինասյանի այն տեսակետի հետ, որ քննիչ հանձնաժողովի աշխատանքում կարեւոր է վստահության մթնոլորտի ապահովումը՝ Անդրանիկ Քոչարյանը փաստել է՝ այդ մթնոլորտը պետք է միասին ստեղծենք:

«Կարեւորում եմ, որ ընդդիմությունը գոնե այս վերջին վեց ամսվա փուլին մասնակցի, քանի որ վերջնական փուլը տալու է շատ հարցերի պատասխաններ: Ամբողջացման փուլում տեսակետների բախման կարիք ունենք՝ օբյեկտիվ, փաստարկված: Շատ լավ կլիներ մեկ տարվա աշխատանքներին էլ մասնակից լինեիք եւ կհամոզվեիք, որ այդ փակ դռների հետեւում որեւէ դավադրություն չի պլանավորվում որեւէ մեկի դեմ, ընդհակառակը՝ այդ աշխատանքները մեզ պետք են մեր երկիրն առաջ տանելու եւ դասեր քաղելու համար»,- ընդգծել է Անդրանիկ Քոչարյանը:

Պատգամավորը նաեւ անդրադարձել է «ԱԺ կանոնակարգ» օրենքում նախատեսվող փոփոխությանը, որով պատասխանատվություն է սահմանվելու քննիչ հանձնաժողովի նիստին չներկայանալու դեպքում:

«Այս գործիքը շատ պետք է Ազգային ժողովին, որ որեւէ մեկը, որն այլեւս չի պաշտոնավարում, մտքով չանցկացնի, որ միայն պաշտոն ունենալու դեպքում ունի պատասխանատվություն, պետք է պատրաստ լինի պաշտոն չունենալու դեպքում եւս ներկայանալու համար մեկ քաղաքական հարթակ եւ պատասխանելու հարցերին»,- եզրափակել է ելույթը հանձնաժողովի նախագահը: