Հայաստանի և Ադրբեջանի սահմանազատման հանձնաժողովները պայմանավորվել են կանոնակարգի հաստատումից հետո համաձայնեցնել հերթականությունն ու շարունակել սահմանի բոլոր հատվածների սահմանազատման գործընթացը, ներառյալ անկլավների և էքսկլավների հարցերը։ Կանոնակարգով լրացվում են հանձնաժողովների գործունեության իրավական հիմքերը։ Այս մասին ԱԺում հայտարարել է փոխվարչապետ Մհեր Գրիգորյանը։

Նա նշել է, որ միաժամանակ կանոնակարգով ստեղծվում է սահմանամերձ բնակիչների անվտանգության լրացուցիչ մեխանիզմերի կիրառման հնարավորությունները։

«Կարգավորվում են նաև հետագայում կնքվելիք ՀՀ-ի և Ադրբեջանի միջև պետական սահմանի մասին պայմանագրին առնչվող ընթացակարգային հարցերը, որում ՀՀ պետական սահմանի միջազգային իրավական հիմքերի ամրագրումը ՀՀ անվտանգության ապահովման, տարածքային ամբողջականության ապահովման իրավական երաշխիք է։

Կանոնակարգից բխում է, որ հետագայում երկու երկրների միջև կնքվելու է պետական սահմանի մասին միջազգային պայմանագիր, այն անցնելու է ներպետական ընթացակարգեր, որից հետո ուժի մեջ կմտնի սահմանագծի անցման նկարագրությունը»,- ասել է նա։