Ընդդիմության առաջնորդները Վրաստանի նախագահ Սալոմե Զուրաբիշվիլուն խորհուրդ են տվել չգնալ դատախազություն՝ բացատրություն տալու ընտրակեղծիքների հայտարարության վերաբերյալ։

Նախագահն ավելի վաղ հայտարարել էր, որ Վրաստանի իշխանությունները կեղծել են հոկտեմբերի 26-ին կայացած խորհրդարանի ընտրությունը:

Իշխող «Վրացական երազանք» կուսակցության գործադիր քարտուղար Մամուկա Մդինարաձեն Զուրաբիշվիլուն խորհուրդ է տվել համագործակցել դատախազության հետ, որը հոկտեմբերի 31-ին նրան կանչել է՝ պարզաբանելու խորհրդարանի ընտրությունը կեղծելու մասին հայտարարությունը։

Երկրի նախագահի նկատմամբ հետաքննություն սկսելու վերաբերյալ Վրաստանի Կենտրոնական ընտրական հանձնաժողովը հայց էր ներկայացրել Գլխավոր դատախազություն: ԿԸՀ-ն Զուրաբիշվիլուն մեղադրել է ընտրական էլեկտրոնային տեխնոլոգիաները վարկաբեկելու փորձի համար։ Դիմումում նշվում է, որ «նախագահը միջազգային մակարդակով փորձում է վարկաբեկել ընտրական վարչակազմին, որն ընտրությունը կազմակերպել էր ամենաբարձր մակարդակով»։