Չեռնոգորիայի Բուդվա քաղաքում անցկացվող բռնցքամարտի աշխարհի երիտասարդական առաջնությունում արցախցի Էրիկ Առստամյանը բավարարվեց  բրոնզե մեդալով:

54 կգ քաշայինների կիսաեզրափակիչում 17-ամյա բռնցքամարտիկը մենամարտեց կուբացի Դրույեթ Յոջանդեր Ֆուենտեսի հետ եւ պարտվեց միավորներով՝ 2:3 հաշվով: 

Առաջին ռաունդում մրցավարները առավելությունը տվեցին Հայաստանի ներկայացուցիչին։ 

Երկրորդ ռաունդում Էրիկ Առստամյանը պահպանեց առավելությունը: Այս անգամ էլ երեք մրցավար հաղթանակը տվեց Առստամյանին:

Երրորդ ռաունդում մրցակիցն ավելացրեց ճնշումը՝ հարվածները հասցնելով նպատակին: Մրցավարները միավորների առավելությունը տվեցին կուբացուն:

Քառորդ եզրափակիչում Էրիկ Առստամյանը 3:2 հաշվով հաղթել էր ադրբեջանցի Թաղի Նասիբովին:

Հայաստանի թիմից բրոնզե մեդալակիր է դարձել նաեւ Անդրանիկ Մարտիրոսյանը:

60 կգ քաշայինների կիսաեզրափակիչում Մարտիրոսյանը մենամարտեց Պուերտո Ռիկոյի ներկայացուցիչ Յանդիել Լոզանոյի հետ եւ պարտվեց 0:5 հաշվով:

Այսօր կիսաեզրափակիչի մենամարտ կանցկացնի նաեւ Ռաֆայել Ներսիսյանը (63,5):