Ադրբեջանը եռակողմ հայտարարության իր պարտավորություններն ընդհանրապես չի կատարել։ Այս մասին Եռաբլուրում լրագրողների հետ զրույցում հայտարարել է Արցախի նախկին պետնախարար, նախկին ՄԻՊ Արտակ Բեգլարյանը։

«Դրա հետևանքն այն է, որ ես և բոլոր արցախցիներն այստեղ ենք, Եռաբլուր ենք այցելում մեր զոհերին հիշատակ մատուցելու համար»,-ասել է Բեգլարյանը։

Հարցին, թե խոսվում է այդ եռակողմ համաձայնագրից Հայաստանի ստորագրությունը ետ կանչելու մասին, դա ի՞նչ կարող է փոխել, Արտակ Բեգլարանը պատասխանել է.

«Ցանկացած բան, որ արվում է, պետք է դրա նպատակը քննարկել․ որն է և ինչ արդյունք և հետևանք ենք ունենալու։ Այս պարագայում մենք ունենք մի իրավիճակ, երբ Հայաստանի կողմից չի խոսվում փաստաթղթի մյուս կետերի մասին, իսկ Ադրբեջանի և ՌԴ-ի կողմից խոսվում է հատկապես 9-րդ կետի վերաբերյալ, որը հիմնարար հարցերից մեկն է, բայց այդ փաստաթութը պետք է դիտարկել ամբողջության մեջ։ Եթե որևէ դրույթի մասին խոսք է ընթանում, ապա փաստաթղթի բոլոր դրույթները պետք է կատարվեն ու հարգվեն։ Բայց չէր ուզի, որ մեր իրավունքների հարցը սահմանափակեինք այս եռակողմ փաստաթղթի սահմաններում։ Պետք է խոսենք մեր հիմնարար իրավունքների մասին, որոնք միջազգային իրավունքի ավելի բարձր նորմերով են ամրագրված, ինչը նշանակում է, որ մենք պետք է վերադառնանք մեր հայրենիք և անվտանգ ու արժանապատիվ կյանք ունենանք»։

Հարցին՝ ով է հիմա բանակցում կամ բանակցելու նրանց վերադարձի համար, Բեգլարյանը պատասխանել է․ «Առաջնային բանակցողը պետք է լինի ՀՀ-ն։ Որովհետև Արցախի իշխանություններին որևէ մեկը հաշվի չի առնում, մենք այլևս գործոն չենք։ Կորցնլով Արցախը՝ որևէ մեկը չի էլ ուզում մեզ հետ հաշվի նստել։ ՀՀ-ն պետք է լինի Արցախի ժողովրդի իրավունքների երաշխավորը՝ բանակցելու միջազգային մակարդակում»։