Ռուսական «Միր» վճարային համակարգն այսօր պաշտոնապես միացավ իրանական «Shetab»–ին։ Իրանի քաղաքացիներն այսուհետ կկարողանան իրենց քարտերով ռուսական բանկոմատներից ռուբլով գումար հանել։
Տեղեկությունը հայտնում է իրանական Tasnim լրատվական գործակալությունը:
«ԿԲ ղեկավարի ներկայությամբ ռուսական «Միր» վճարային համակարգը պաշտոնապես միացվեց իրանական «Shetab» բանկային ցանցին։ «Shetab»–ին «Միր»–ի միացման շնորհիվ իրանական քարտերը հնարավոր կլինի օգտագործել Ռուսաստանի բանկոմատներից գումար հանելու համար»,– ասված է իրանական գործակալության հաղորդագրության մեջ:
Նշվում է, որ Ռուսաստանի քաղաքացիները կկարողանան Իրանում ռուսական բանկային քարտերից կանխիկ գումար հանել այս որոշման երկրորդ փուլում, իսկ երրորդ փուլում իրանական «Shetab» քարտերը հնարավոր կլինի օգտագործել ռուսական խանութներում:
Հիշեցնենք, որ այս տարվա օգոստոսին Ռուսաստանում Իրանի դեսպանը հայտնել է, որ Իրանի Իսլամական Հանրապետության տարածքում «Միր» վճարային համակարգը կսկսի գործել կես տարվա ընթացքում։
Ավելի վաղ՝ հուլիսի 6-ին, Իրանի կենտրոնական բանկի ղեկավար Մոհամմադ Ռեզա Ֆարզինը հայտնել էր, որ Ռուսաստանն ու Իրանն ավարտել են «Միր» և «Shetab» համակարգերի ինտեգրումը: Բացի այդ, երկու երկրների ԿԲ ղեկավարները համաձայնագիր են ստորագրել ազգային արժույթների իրացվելիության մասին՝ երկկողմ առևտուրը հեշտացնելու համար։
-thumbnail.jpg)
-thumbnail.jpg)
-thumbnail.jpg)