Նշվում է, որ վեց հոգուց բաղկացած խումբը՝ գլխավոր դատախազի նախկին տեղակալ Ադիլ ուլու Կուբանի ուղղորդմամբ նպատակադրվել էր հրահրել զանգվածային անկարգություններ, ապակայունացնել իրավիճակը և իրականացնել իշխանության բռնի զավթում: Ըստ քննիչների՝ կասկածյալներն այդ նպատակով մտադիր էին նոյեմբերի 17-ին՝ տեղական ինքնակառավարման մարմինների ընտրությունների օրը, ազգային սպորտային խաղեր անցկացնելու պատրվակով հնչեցնել բռնի գործողություններ իրականացնելու և հակասահմանադրական պահանջներ ներկայացնելու կոչեր:

Ձերբակալվածների թվում է օտարերկրյա քաղաքացի, որը մարտական գործողությունների է մասնակցել արտերկրում: Զանգվածային անկարգություններին մասնակցելու համար նա պետք է կազմակերպեր ֆիզիկապես պատրաստված անձանց ընտրությունը, հավաքագրումը և հրահանգավորումը։ Խմբի մեկ այլ օտարերկրացի անդամը նույնպես ունի արտասահմանում մարտական գործողությունների մասնակցելու փորձ. նա անօդաչու թռչող սարքերի հետ աշխատելու մասնագետ է, որը տիրապետում է նաև պայթուցիկ սարքեր պատրաստելու և կիրառելու հմտություններին:

Ձերբակալվածներին առաջադրվել է զանգվածային անկարգություններ կազմակերպելու, իշխանությունը բռնությամբ զավթելու փորձի, Ղրղզստանի քաղաքացու՝ օտար պետության տարածքում զինված հակամարտություններին կամ ռազմական գործողություններին մասնակցելու մեղադրանք: Հարուցվել է քրեական գործ՝ բռնությամբ, ջարդերով, հրկիզմամբ, գույքի ոչնչացմամբ, հրազենի, պայթուցիկ նյութերի կամ պայթուցիկ սարքերի կիրառմամբ զանգվածային անկարգություններ նախապատրաստելու և իշխանության ներկայացուցիչներին զինված դիմադրություն ցուցաբերելու հոդվածով։

Ղրղզստանի օրենսդրության համաձայն՝ ձերբակալության ժամկետի լրանալուց հետո քննչական մարմինները կարող են հանդես գալ կասկածյալների կալանքը երկարացնելու միջնորդությամբ: