Միլանի «Ինտերի» հայ կիսապաշտպան Հենրիխ Մխիթարյանը լայնածավալ հարցազրույց է տվել իտալական Corriere della Sera օրաթերթին։

— Դուք ֆուտբոլիստ եք առանց ավելորդությունների։ Համարո՞ւմ եք Ձեզ հակաաստղ։

—Այո, ինձ չեն հետաքրքրում դաջվածքները կամ տարօրինակ սանրվածքները: Տեսեք` երկու փոքրիկ ճաղատ հատված ունեմ գլխիս վրա, բայց դա ինձ չի հետաքրքրում: Դա բնական է։

— Կարծես թե սա ակնարկ է ձեր երկու թիմակիցների դեմ, որոնք ներկել են իրենց մազերը։

— Ոչ, բոլորովին։ Յուրաքանչյուրն անում է այն, ինչ ուզում է։

— Դուք մասնագիտություն ունե՞ք։

— Այո, երկու դիպլոմ ունեմ՝ սպորտի կառավարման և տնտեսագիտության։

—Կարո՞ղ ես ֆուտբոլում ինտելեկտուալ լինել՝ առանց խաղադաշտից դուրս այդպիսին լինելու։

— Չեմ կարծում։ Ակնհայտ է, թե ով է խելացի խաղադաշտում և դրա սահմաններից դուրս։ Ունեցել եմ թիմակիցներ, որոնք ձևացնում էին, թե խելացի են խաղադաշտում, բայց դրա սահմաններից դուրս այդպիսին չէին։

— Ինչպե՞ս է օգնում շախմատը Ձեզ։

—  Այն օգնում է մտածել, կարդալ խաղը, հասկանալ իրավիճակը և թիմակցի մտքերը։ Շախմատը մեծապես օգնում է ինձ։

—  Ֆուտբոլում դաստիարակությունը հաճախ շփոթում են բնավորության պակասի հետ, այդպե՞ս է:

—  Չեմ կարծում։ Բնավորությունն ունես կամ չունես։ Ինչպես տաղանդը։

— Ճի՞շտ է, որ խոսում եք յոթ լեզվով։

—  Հինգ։ Հայերեն, ռուսերեն, ֆրանսերեն, անգլերեն և իտալերեն։ Գերմաներեն գիտեի, բայց մոռացել եմ։

—  Ի՞նչ լեզվով եք մտածում:

— Եթե իտալերեն եմ խոսում, իտալերեն եմ մտածում։

— Ի՞նչ լեզվով եք հայհոյում:

—  Չեմ հայհոյում:  Վատ խոսքեր ասել չեմ սիրում։

—  Ճի՞շտ է, որ գիրք եք գրում:

-Այո, դեռ պետք է սկսեմ: Ես շատ բան ունեմ պատմելու իմ կարիերայի և իմ կյանքի մասին:

Հիմա Զիդանի գիրքն եմ կարդում, նրա կենսագրության մասին: