Հայաստանի ներկայիս վերաբերմունքը ՀԱՊԿ-ի նկատմամբ թելադրված է ներքաղաքական խնդիրներով և Լեռնային Ղարաբաղի ճգնաժամի հետևանքներով։ ՌԴ նախագահ Վլադիմիր Պուտինը լրագրողներին այսպես է մեկնաբանել Ղազախստանում այսօր կայացած Հավաքական անվտանգության խորհրդի նիստին հայկական կողմի բացակայությունը։

Նա հավելել է, որ ՀԱՊԿ-ը չպետք է Հայաստանի համար կռվեր ԼՂ-ում, այս դեպքում Հայաստանի դեմ արտաքին ագրեսիա չի եղել.

«Ղարաբաղի հետ կապված իրադարձություններն ունեն իրենց առանձնահատկությունները, Հայաստանը չի ճանաչել Ղարաբաղը որպես անկախ պետություն և, իհարկե, Ղարաբաղը չի ներառել իր պետական ​​պարագծում։ Սա նշանակում է, որ այն ամենն, ինչ տեղի է ունեցել Ղարաբաղում, իրավական տեսակետից Հայաստանի հետ անմիջական առնչություն չունի։ Տարօրինակ է պնդել, որ ՀԱՊԿ-ը պետք է կռվեր Լեռնային Ղարաբաղի տարածքում»,- ասաց նա։

Յուրաքանչյուր երկիր, ըստ Պուտինի, իրավունք ունի ինքնուրույն ընտրել, թե ինչ անել անվտանգության ոլորտում։