Բանակցային գործընթացի վերաբերյալ իշխանություններից տեղեկատվություն չեն տրամադրում, որովհետև ՀՀ անունից բանակցող կողմը կարմիր գծեր չունի։ Այս մասին ԱԺ ճեպազրույցների ընթացքում հայտարարել է ՀՀ ԱԺ «Պատիվ ունեմ» խմբակցության ղեկավար Հայկ Մամիջանյանը։

Ըստ Մամիջանյանի՝ հայկական կողմը վախենում է հնչեցնի կարմիր գիծ ու հետագայում դրա համար հավելյալ սուտ ստիպված լինի հորինել։

«Կարմիր գիծ չունեն, որովհետև Փաշինյանն ընկած է Ալիևի «ավտոգրաֆը» ստանալու հետևից, ինչպես աստղերի հետևից են վազում։ Փաշինյանին պետք է մի թուղթ, որի վրա գրված է՝ «խաղաղություն»։ Այդ թուղթը բացառապես կեղծ է լինելու, ոչ մի կապ չի ունենալու իրականության հետ՝ տակը Ալիևի «ավտոգրաֆը», որպեսզի ինքը կարողանա քարոզարշավ անի։ Ահա թե ինչու չեն պատասխանում»,- ասել է Մամիջանյանը և նշեց՝ «մեռած ձևանալու տարբերակը չի աշխատելու»։

«Առհասարակ՝ մեռած ձևանալով՝ Ադրբեջանի հետ չեն բանակցում, ոչ մի երկրի հետ չեն բանակցում, դու պետք է հստակ քո կարմիր գծերը նշես»,-ասել է նա։