Մեր ձախողումը երկրի վտանգի վրա այդքան ազդեցություն չի ունեցել, որովհետև Նիկոլ Փաշինյանի ձախողումները շարունակվում են։ Այս մասին ԱԺ-ում ճեպազրույցների ընթացքում հայտարարել է «Հայաստան» խմբակցության պատգամավոր Արթուր Խաչատրյանը:

«Այսինքն՝ մեր ձախողումը Նիկոլ Փաշինյանի ձախողումները չկանխելն է, դուք հիմքը թողած՝ վերադառնում եք ածանցյալին: Եթե մենք չձախողեինք, այսօր 17 ստրկացուցիչ կետ սեղանին դրված չէր լինի: Եթե դուք մեր երկրի մասին մտածում եք, դուք պետք է օգնեք մեզ, որ այս իշխանությունները շուտ գնան Բաքու, որովհետև Երևանում իրենց ոչ ոք չի սպասում։ Մենք ասել ենք, որ իշխանություններին հեռացնելը մեր օրակարգում է։ Չենք ասել՝ դա կլինի դեկտեմբերի 6-ին։ Օրինակ, այս տարի եղել են բողոքներ, դրանց ալիքը մեծացել է: Այո՛, մեր քաղաքական նպատակն ուժի մեջ է, երկիրը փրկելու համար իրենք պետք է գնան, ինչքան շուտ, այդքան լավ։ Դա է պատասխանս»,-ասել է պատգամավորը: