ՀՀ վարչապետի տիկին Աննա Հակոբյանը Խորվաթիայի Հանրապետություն այցի երկրորդ օրը մասնակցել է «Եվրոպական առաջնորդների տիկնանց/ամուսիններ գագաթնաժողով»-ին:

Այս մասին տեղեկացնում են ՀՀ վարչապետի տիկին Աննա Հակոբյանի գրասենյակից։

Լուսանկարահանման արարողությունից հետո մեկնարկել է գագաթնաժողովը՝ ՀՀ վարչապետի տիկին Աննա Հակոբյանի, Խորվաթիայի առաջին տիկին Սանյա Միլանովիչի, Իսպանիայի թագուհի Լետիցիայի և ավելի քան մեկ տասնյակ երկրների ղեկավարների կանանց և ամուսինների մասնակցությամբ:

Քննարկման թեմաներից էր մանկական գիրության կանխարգելման ու դրա դեմ պայքարի հարցը, որի ընթացքում տարբեր երկրների առաջին տիկիններ հանդես են եկել հայտարարություններով, ներկայացրել իրենց երկրի փորձը, կիրառվող նորարարական լուծումներն ու սահմանված առաջնահերթությունները:

Նշվում է, որ Եվրոպայի տարածաշրջանում դպրոցական տարիքի յուրաքանչյուր երրորդ երեխան գիրության հակում ունի՝ նկատել են քննարկման մասնակիցները: Գիրացումը, հատկապես վաղ տարիքում, մարտահրավեր է բոլոր երկրների համար՝ արձանագրել են քննարկման մասնակիցները, իսկ դրա դեմ պայքարը հնարավոր է միայն համատեղ ուժերով:

 Քննարկման ընթացքում կարճ ելույթ է ունեցել ՀՀ վարչապետի տիկին Աննա Հակոբյանը. «Ես պետք է անկեղծ ասեմ, որ այս թեման իմ ուշադրության կենտրոնում չի եղել թերևս օբյեկտիվ պատճառներով՝ պայմանավորված այնպիսի կարևոր խնդիրներով, ինչպիսիք են պատերազմը, Լաչինի միջանցքի շրջափակումն ու Լեռնային Ղարաբաղում առաջացած հումանիտար ճգնաժամը: Լեռնային Ղարաբաղում կան բազմաթիվ երեխաներ, որոնք սնունդ ստանալու հետ կապված խնդիրներ ունեն: Բայց ես շատ եմ կարևորում այս թեման, շնորհակալություն եմ հայտնում այստեղ գտնվելուս հրավերի համար։ Հայաստանի Հանրապետության կառավարությունը ջանքեր է գործադրում այստեղ քննարկված խնդիրների կանխարգելման ուղղությամբ, այսուհետ հարցը կլինի իմ ուշադրության կենտրոնում ևս։ Մենք պետք է օր առաջ խնդրի դեմ պայքարենք, որ այն հետո էլի ավելի չբարդանա»։

Քննարկման ավարտին ընդունվել է Զագրեբի հռչակագիրը, ըստ որի գագաթնաժողովին մասնակից երկրների ներկայացուցիչները հայտարարում և ընդունում են մանկական գիրության դեմ պայքարում համատեղ աշխատանքի անհրաժեշտությունը, պարտավորվում են ապահովել երեխաների համար առողջ սննդի և ֆիզիկական ակտիվության համար անհրաժեշտ համապատասխան միջավայր:

ՀՀ վարչապետի տիկին Աննա Հակոբյանի գրասենյակից հայտնում են, որ Զագրեբ ժամանած առաջին տիկինների համար կազմակերպվել էր նաև մշակութային այց՝ Խորվաթիայի ազգային թատրոն, ինչպես նաև նաև վոկալ ու բալետային ներկայացումներ: