Քաղաքականությունը սենյակ չէ, որ դուռը փակես դուրս գաս։ Դա հոգեվիճակ է, դա իրավիճակ է, դա քո շուրջը կատարվող իրադարձություններն են, որոնցից դու չես կարողանում անմասն մնալ։ Հիմա կա ակտիվ պրոցես, կա պասիվ պրոցես, հիմա ներկայումս պասիվ պորցեսի մեջ եմ, ուղղակի հետևում եմ, ուշադիր նայում եմ՝ ով ինչ է խոսում, ինչով է զբաղվում, ինչ անում, որ ուժը իրեն ոնց է դրսևորում։

Այս մասին այսօր Hayastan.news-ի հետ զրույցում ասաց ԱԺ «Հայաստան» խմբակցության նախկին պատգամավոր, 2022 թ․ ապրիլի հուլիսի 4-ին մանդատից հրաժարված Արթուր Ղազինյանը։

-Խորհրդարանից դուրս գալուց հետո մի շրջան ակտիվ գրառումներ էիք անում, հիամ դա էլ չեք անում։ Հիսաթափվե՞լ եք ինչ-որ բանից և այլևս անիմա՞ստ եք համարում Ձեր խոսքը բարձրաձայնելը։

-Չէ, որևէ բանից չեմ հիասթափվել, ես գտնվում եմ պասիվ շրջանում քաղաքական պրոցեսների առումով, և առայժմ լուռ հետևում եմ։

-Իսկ երկրի իրավիճակի մասով ի՞նչ կասեք, մի կողմից իշխանությունը խաղաղության պայմանագրի է ձգտում, մյուս կողմից դարձյալ կրակոցներ են սահմանին։

-Ես առաջին իսկ օրվանից ասել եմ, որ այս իշխանության հետ որևէ խաղաղության հասնել հնարավոր չէ, որովհետև խաղաղությունները հաստատվում են կա՛մ հակամարտող կողմերից մեկի կապիտուլյացիայով, կա՛մ նոր ձևավորված ուժերի բալանսով։ Ոնց տեսնում եք՝ ուժերի բալանս չի ձևավորվում, իսկ կապիտուլյացիան անխուսափելի է այս պարագայում։

-Իսկ ընդդիմության գործունեության վերաբերյալ ի՞նչ կասեք, ինչպես տեսանք՝ «Հայաստան» դաշինքը, որի մաս էիք կազմում Դուք, նորից վերադարձել է խորհրդարան, մասնակցում է կառավարության հետ հարցուպատասխանին, հարցեր է ուղղում Նիկոլ Փաշինյանին․․․

-Գնահատական չեմ տա, ժողովուրդն ամեն ինչ տեսնում է, ամեն ինչ շատ լավ հասկանում է, ամենքն իր գնահատականը տալիս է, եթե ամեն ինչ լավ լիներ՝ դուրս չէի գա։

-Իսկ միտք ունե՞ք առաջիկայում նորիօց մտնել քաղաքական ակտիվ պրոցեսների մեջ, հատկապես՝ այս տարի սպասվում են Երևանի ավագանու ընտրություններ։

-Այս պահին պլաններ չունեմ ընտրություններին մասնակցելու։

-Քաղաքական ուժերի կողմից Երևանի ավագանու սպասվող ընտրությունները գլխավոր օրակարգ դարձնելու վերաբերյալ ի՞նչ կասեք։

-Ամեն դեպքում, ցանկացած ընտրական պրոցես համարվում է քաղաքական տրամադրությունների գեներացիայի միջոց, հետևաբար, եթե կա հնարավորություն դա օգտագործելու՝ ինչո՞ւ ոչ, եթե չի հաջողվում այլ կերպ գեներացնել տրամադրությունները, գոնե քաղաքապետի ընտրություններով կարողանան ինչ-որ բան անել։

-Կհաջողվի՞ ընդդիմությանը միասնական թեկնածուով հանդես գալ, կամ ճի՞շտ է դա, թե՞ ոչ։

-Ես չգիտեմ՝ ճի՞շտ է,արդյոք, միասնական թեկնածուով հանդես գալը, թե՞ պետք է ցանցային մոդելով հանդես գալ՝ թույլ չտալով իշխանությանը մեկ անուն և մեկ պիտակ կպխցնել ընդդիմությանը։ Ամեն մեկը իր անկյունից, ամեն մեկն իր տեղից հարվածներ հասցնել՝ դա արդեն մարտավարական խնդիր է, ընդդիմությունն ինքը պետք է որոշի։ Եւ երկրորդը, չեմ պատկերացնում՝ ինչպես է հնարավոր միացյալ ընտրության հնարավորությունը։

-Որոշ ընդդիմադիրների կարծիքով՝ Երևանի ավագանու ընտրությունները երևի թե միակ միջոցն են, որը հիմնական իշխանափոխության պլատֆորմ կստեղծի, եթե իրենք կարողնան քաղաքը վերցնել, իհարկե։ Դուք ի՞նչ կասեք սրա վերաբերյալ։

-«Եթե»-ն շատ լավն էր, Ձեր հարցի պատասխանը այդ «եթե» բառի մեջ է թաքնված։ Նորից եմ ասում՝ հնարավորություններ կան, իշխանությունը վարկաբեկվում է, իշխանության վարկանիշը անկում է ապրում, ուղղակի այլընտրանքի բացակայությունն է այս իշխանությանը պահում։ Եթե ձևավորվի իրական այլընտրանք, այսինքն՝ ոչ թե մարդու տեսքով, այլ՝ համակարգի, այսինքն՝ իշխանության այլընտրանքային համակարգ, ապա ես կարծում եմ՝ կարճ ժամանակահատվածում հնարավորություն կլինի։

-Այդ այլընտրանքը պետք է նաև ընդդիմությա՞ն համար այլընտրանք լինի, որ մարդիկ Ռոբերտ Քոչարյանից ու Սերժ Սարգսյանից բացի այլ՝ երրորդ, չորրորդ տարբերակներ էլ ունենան։

-Ժողովուրդն իրավունք ունի ընտրության, նրան չպետք է պարտադրվի՝ կա՛մ սա է, կա՛մ սա է, գնա՛, ընտրիր։ 

-Իսկ Ձեր հիմնած «Մեկ Հայաստան» կուսակցությունը կա՞, գործո՞ւմ է, թե՞ սառեցված վիճակում է։

-Ոչ, այս պահին սառեցված վիճակում է գտնվում։

-Իսկ Դուք ինչո՞վ եք զբաղված։

-Իրավաբանական, մասնավոր ծառայությունների ոլորտում եմ այս պահին զբաղված, հիմնել եմ իմ իրավաբանական ընկերությունը՝ «Ղազինյան և գործընկերներ», և հիմա զբաղված եմ կիրառական դաշտում իրավաբանական մշակույթ ներդնելու գործով։

Վահե ՄԱԿԱՐՅԱՆ

Հետևեք Hayastan.news-ի տելեգրամյան ալիքին այստեղ