Արցախի ԱԺ նախագահ Արթուր Թովմասյանը ցավակցել է Մուրադ Պետրոսյանի մահվան կապակցությամբ: Հայտնում են Արցախի Հանրապետության ԱԺ լրատվության և հանրության հետ կապերի բաժնից:

«Սրտի ցավով տեղեկացանք պետական-քաղաքական, հասարակական գործիչ, ԱՀ ԱԺ 1-ին և 2-րդ գումարումների պատգամավոր  Մուրադ Ազատի Պետրոսյանի անժամանակ  մահվան մասին։

Մուրադ Պետրոսյանի գործունեությունը մեծ ներդրում է Արցախի Հանրապետության պետական համակարգի պատմության մեջ: Թե օրենսդիր, թե գործադիր մարմիններում ծավալած իր նվիրական աշխատանքով ակտիվորեն ու արժանապատվորեն մասնակցում էր մեր երկրի պետականության կայացմանն ու կառուցմանը:

Մուրադ Պետրոսյանը Արցախյան շարժման առաջամարտիկներից էր։

Դեռևս  1977-1988թթ. Մուրադ Պետրոսյանը զբաղվում էր ազգային ինքնագիտակցության զարթոնքի քարոզչությամբ: 1983թ.ապրիլի 24-ին Արցախում առաջին անգամ «Մենք ենք՝ մեր սարերը» կոթողի մոտ կազմակերպել է հանրահավաք նվիրված Մեծ եղեռնի զոհերի հիշատակին:

1991թ.-ին ընտրվել է ԼՂՀ առաջին գումարման,իսկ 1995-ին՝ ԼՂՀ 2-րդ գումարման Գերագույն խորհրդի պատգամավոր:
1996թ. խորհրդարանում իմ նախաձեռնությամբ ստեղծված «Ծայրահեղ կարիքավոր ընտանիքներին  օգնության հիմնադրամ»-ի աշխատանքները  մինչև 1999թ շարունակել է Մուրադ Պետրոսյանը։

1997թ. ԱԺ պաշտպանության և անվտանգության մշտական հանձնաժողովի նախագահն էր։

Անաչառ, սկզբունքային անհատականություն էր, ճշմարիտ հայրենասեր։

Արցախի Ազգային ժողովի և անձամբ իմ անունից խորապես ցավակցում եմ  Մուրադ Պետրոսյանի ընտանիքին, հարազատներին ու մտերիմներին, կիսում կորստյան ծանր վիշտը»։