Առողջապահության համաշխարհային կազմակերպությունը (ԱՀԿ) ափսոսում է կազմակերպությունից դուրս գալու ԱՄՆ-ի որոշման համար։ Այս մասին երեքշաբթի ասել է ԱՀԿ խոսնակ Տարիկ Ժազարևիչը։

Ավելի վաղ ԱՄՆ նախագահ Դոնալդ Թրամփը հրաման էր ստորագրել Առողջապահության համաշխարհային կազմակերպությունից երկրի դուրս գալու մասին։

«Առողջապահության համաշխարհային կազմակերպությունը ցավում է, որ Ամերիկայի Միացյալ Նահանգները մտադիր է դուրս գալ կազմակերպությունից», - ճեպազրույցում ասել է Ժազարևիչը։

Նա ասել է, որ կազմակերպությունը կարևոր դեր է խաղում ամբողջ աշխարհում մարդկանց, այդ թվում՝ ամերիկացիների առողջության և անվտանգության պաշտպանության գործում:

«Մենք հուսով ենք, որ ԱՄՆ-ը կվերանայի իր որոշումը և ակնկալում ենք կառուցողական երկխոսություն՝ պահպանելու ԱՄՆ-ԱՀԿ գործընկերությունը՝ հանուն աշխարհի միլիոնավոր մարդկանց առողջության և բարեկեցության», - հավելել է ԱՀԿ-ի ներկայացուցիչը: