Ռուբեն Վարդանյանի ընտանիքը լիահույս է, որ ԱՄՆ նոր վարչակազմը եւ նախագահ Թրամփը կարող են օգնել Բաքվում պահվող հայ ռազմագերիներին։ Այդ մասին Ֆրանսիայում գործող հայկական AYPFM ռադիոյին տված հարցազրույցում ասել է Արցախի նախկին պետնախարարի որդի Դավիթ Վարդանյանը, գրում է «Մեդիամաքսը»։

«Մենք հույսեր ունենք ԱՄՆ նոր նախագահի վարչակազմի հետ կապված: Դոնալդ Թրամփը գրել էր, որ պաշտպանելու է Լեռնային Ղարաբաղի քրիստոնյաների իրավունքները, եւ մենք տեսանք, որ նոր վարչակազմի մաս կազմեցին Հայաստանի եւ հայ ժողովրդի բարեկամներից ոմանք: Ես գիտեմ, որ մարդու իրավունքների, հատկապես՝ քրիստոնյաների իրավունքների հարցը շատ կարեւոր է նրանց համար, ահա թե ինչու մենք լիահույս ենք, որ այս վարչակազմը եւ նախագահ Թրամփը կարող են օգնել հայ ռազմագերիներին այս հարցերում», - ասել է Դավիթ Վարդանյանը։

«Չնայած խոշտանգումներին եւ Բաքվում իր դեմ ուղղված անձնական բոլոր սպառնալիքներին՝ նա [Ռուբեն Վարդանյանը] մեզ ասել է, որ Արցախի ժողովրդի իրավունքների հարցը շատ կարեւոր է իր համար։ Նա մարտական է տրամադրված, անդրդվելի է, նա ասում է, որ չնայած բոլոր վտանգներին՝ ցանկանում է ասել ճշմարտությունը:

Հունվարի 17-ին՝ դատավարության առաջին օրը,  նա առաջարկել է Ադրբեջանի դատարանին մեկ րոպե լռությամբ հարգել հակամարտության բոլոր զոհերի հիշատակը ՝ անկախ ազգությունից:  Չնայած իրավիճակին, չնայած ինչպես իր, այնպես էլ մյուս հայերի հանդեպ բոլոր անարդարություններին՝ հայրս ցանկանում է ասել, որ միակ ընտրությունը, որ մենք ունենք՝ ապրելն է առանց պատերազմի աշխարհում, միմյանց հետ բանակցելն է եւ փոխադարձաբար միմյանց հասկանալը», - նշել է Դավիթ Վարդանյանը։