Ռուսաստանը Բաքվում «Ռուսական տան» աշխատանքի հարցը կբարձրացնի տարբեր մակարդակների, հնարավոր է նույնիսկ ամենաբարձր մակարդակի գործընկերների հետ, ասել է ՌԴ նախագահի մամուլի քարտուղար Դմիտրի Պեսկովը։

Ավելի վաղ Ադրբեջանը պաշտոնապես նոտա էր հղել ռուսական կողմին՝ փետրվարի 3-ին Բաքվում «Ռուսական տան» գործունեությունը դադարեցնելու մասին։

«Իհարկե, մենք այս հարցը կբարձրացնենք տարբեր մակարդակների մեր գործընկերների հետ։ Եթե ​​ամենաբարձր մակարդակով շփումներ լինեն, ապա մենք, հավանաբար, չենք բացառում, որ այդ հարցը կարող է բարձրացվել երկու երկրների ղեկավարների երկխոսության ժամանակ»,- լրագրողներին ասել է Պեսկովը։

Նա պարզաբանել է, որ ամեն դեպքում Ռուսաստանը նախատեսում է այդ խնդիրները լուծել երկխոսության միջոցով՝ առաջնորդվելով ավանդական լավ հարաբերություններով։