Ազգային ժողովի եվրոպական ինտեգրման հարցերի մշտական հանձնաժողովի նախագահ Արման Եղոյանը Եվրամիությանը ՀՀ-ին անդամակցելու գործընթաց սկսելու մասին նախագծի քննարկման ժամանակ ներկայացրեց, թե որ դեպքում Հայաստանը կարող է դուրս գալ Եվրասիական տնտեսական միությունից։ 

«Արմենպրես»-ի հաղորդմամբ՝ Եղոյանն ընդգծեց, որ Հայաստանը ԵԱՏՄ-ից դուրս կգա միայն այն դեպքում, եթե Եվրամիության հետ ստորագրի ազատ առևտրի համաձայնագիր։ 

«Շատ քննարկվեց ԵԱՏՄ-ում մեր անդամակցության հարցը։ Չեմ ուզում խուսափողական պատասխաններ տալ։ Ակնհայտ է, որ Հայաստանի Հանրապետությունն այս օրենքը («Եվրոպական Միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագծի ընդունում-խմբ․) ընդունելու դեպքում, եթե անի իր հաջորդ քայլը դեպի Եվրոպական միություն (այսօրվա մեր իրավապայմանագրային բազային գումարած ևս մեկ քայլ պետք է անի), դա պետք է լինի ազատ առևտրի համաձայնագիրը։ Շատ դասական փաստաթուղթ, որի շուրջ նախորդ կառավարությունը բանակցում էր տարիներ շարունակ, և որը չստորագրվեց հայտնի պատճառներով։ Ահա, եթե նման փաստաթուղթ ստորագրվի Եվրամիության հետ և այն օրը, երբ այդ համաձայնագիրը ուժի մեջ մտնելու լինի, Հայաստանը այլևս չի կարող լինել ԵԱՏՄ անդամ։ Եթե խոսում ենք դասական ազատ առևտրի համաձայնագրից, այլ ոչ թե չորս կողմից կտրտած և հիբրիդային փաստաթղթից։ Այստեղ երկու կարծիք լինել չի կարող։ Բայց դա ճանապարհ է, որը պետք է անցնենք և չեմ կարող ասել, թե ինչքան ժամանակում»,- ասաց Եղոյանը։