Ղազախստանի ՆԳՆ կիբերհանցագործության դեմ պայքարի վարչության և Հայաստանի քննչական կոմիտեի հատկապես կարևոր գործերի քննության գլխավոր վարչության աշխատակիցների համատեղ գործունեության արդյունքում Երևանում դադարեցվել է խարդախությամբ զբաղվող երկու կենտրոնների գործունեությունը, հայտնում է Polisia.kz-ն՝ Ղազախստանի ՆԳՆ Ոստիկանության պաշտոնական կայքը։

Բացահայտվել և կալանավորվել են Ղազախստանի և եվրոպական երկրների քաղաքացիների նկատմամբ ինտերնետային խարդախությամբ զբաղվող անդրազգային հանցավոր խմբի կազմակերպիչներն ու անդամները, որոնք իրենց զոհերին առաջարկում էին գումար ներդնել ենթադրաբար խոշոր ներդրումային ընկերություններում։ Խուզարկությունների ընթացքում առգրավվել է ավելի քան 70 միավոր համակարգչային տեխնիկա, մոտ մեկ կիլոգրամ ոսկի, 5 ավտոմեքենա, 30 հազար ԱՄՆ դոլար, ռուսական ռուբլի, վրացական լարի և կրիպտոարժույթով դրամապանակ, հայտնել է ՆԳՆ կիբերհանցագործության դեմ պայքարի վարչության պետ Ժանդոս Սույինբայը։

Հատուկ գործողության ընթացքում ձերբակալվել է հանցախմբի 41 անդամ՝ Հայաստանի, Վրաստանի, Իրանի, Սիրիայի և Լիբանանի քաղաքացիներից։ Այս պահին հայկական կողմը Ղազախստանի ՆԳՆ կիբերհանցագործության դեմ պայքարի վարչության աջակցությամբ իրականացնում է քննչական գործողություններ և օպերատիվ-որոնողական աշխատանքներ։

Դրանք միտված են պարզելու բոլոր հանգամանքները, լրացուցիչ դրվագները, ապօրինի գործունեության հանցակիցները, ինչպես նաև Ղազախստանի քաղաքացիներին պատճառված վնասի չափը։