Ռուսաստանի արտգործնախարար Սերգեյ Լավրովը Պետդումայում կառավարության ժամին հայտարարել է, որ ծրագրում է մոտ ապագայում շփումներ ունենալ Իրանի ներկայացուցիչների հետ։ Խորհրդարանականների հարցին ի պատասխան Իրանի կողմից Կասպից ծովի իրավական կարգավիճակի մասին կոնվենցիայի վավերացման հեռանկարների մասին՝ Լավրովը նշել է, որ իրանական կողմը ներկայումս կոնվենցիայի վավերացումը կապում է այն հարցի լուծման հետ, թե ինչպես կառուցել «ուղիղ գծեր, որոնք որոշում են յուրաքանչյուր պետության ազգային գոտու պարամետրերը»։

«Մենք փորձագիտական ​​մակարդակով առաջարկել ենք լուծումների մի ամբողջ շարք, և մեր իրանցի գործընկերները քննարկում են դրանք: Առաջիկայում ես կապի մեջ կլինեմ Իրանի ներկայացուցիչների հետ, մենք ամեն անգամ բարձրացնում ենք այդ հարցերը նման հանդիպումների ժամանակ»,- ընդգծել է ՌԴ ԱԳ նախարարը։

Նա նաև հիշեցրել է, որ 2023 թվականին իր նախագահությամբ Ռուսաստանում ստեղծվել է Կասպյան համագործակցության միջգերատեսչական հանձնաժողով։ «Այնտեղ նույնպես մենք նախաձեռնություններ ենք մշակում, որոնք պետք է օգնեն մեր իրանցի ընկերներին ավարտին հասցնել վավերացման գործընթացը»,- հավելել է Լավրովը։