Մանե Թանդիլյանի առողջական վիճակն այս պահին լավ չէ։ Բժիշկները հորդորում են դադարեցնել հացադուլը։ Այս մասին ՍիվիլՆեթին հայտնեց «Ապրելու երկիր» կուսակցության համահիմնադիր Մեսրոպ Առաքելյանը։

«Այս պահին Մանե Թանդիլյանը հիվանդանոցում հետազոտություններ է անցնում»,- ասաց Առաքելյանը։

Հացադուլի մեջ գտնվող «Ապրելու երկիր» կուսակցության համահիմնադիր Մանե Թանդիլյանն այսօր Ազատության հրապարակից շտապօգնության մեքենայով տեղափոխվել է հիվանդանոց:

Մանե Թանդիլյանը մարտի 1-ից հացադուլ է սկսել, խնդրելով Արցախի նախկին պետնախարար, Բաքվում ապօրինի պահվող Ռուբեն Վարդանյանին դադարեցնել հացադուլը։

Ռուբեն Վարդանյանը փետրվարի 19-ից հացադուլ է սկսել՝ ի նշան իր նկատմամբ իրականացվող դատական ֆարսի: Հացադուլի պատճառով փետրվարի 25-ին նրա ինքնազգացողությունը վատացել էր Բաքվի դատարանում: