Սիրիական բանակի ստորաբաժանումները ժամանել են Տարտուս նահանգի Բանիաս քաղաք՝ աջակցելու անվտանգության ուժերին սիրիական նոր իշխանություններին հակադրվող զինված խմբավորումների դեմ պայքարում, հայտնում է SANA-ն։

Հինգշաբթի օրը կատաղի բախումներ են տեղի ունեցել Ջեբլա քաղաքում, Լաթաքիա քաղաքի մի քանի շրջաններում, Լաթաքիա և Տարտուս նահանգների լեռնային շրջաններում սիրիական անվտանգության ուժերի և Դամասկոսի նոր կառավարությանը դեմ հանդես եկող զինված խմբավորումների միջև։

Ուրբաթ գիշերը բանակի և ներքին գործերի նախարարության լրացուցիչ ստորաբաժանումներ են ժամանել Տարտուս և Լաթաքիա նահանգներ։ Բանակը կիրառել է մարտական ​​ուղղաթիռներ։

Տեղի իշխանությունները սրման ֆոնին պարետային ժամ են սահմանել։

«Սիրիայի պաշտպանության նախարարության ուժերը ժամանել են Բանիաս քաղաք (Տարտուս նահանգ)՝ աջակցելու տապալված ռեժիմի զինված կազմավորումներին հետապնդելու Գլխավոր անվտանգության վարչության ջանքերին», - հաղորդում է գործակալությունը։

2024 թվականի նոյեմբերի վերջին սիրիական ընդդիմության զինված կազմավորումները լայնածավալ հարձակում սկսեցին սիրիական բանակի դիրքերի դեմ և դեկտեմբերի 8-ին մտան Դամասկոս, Ասադը թողեց Սիրիայի նախագահի պաշտոնը և լքեց երկիրը։

Սիրիայի նոր վարչակազմի ղեկավար Ահմեդ ալ-Շարաան հունվարի 29-ին հռչակվել է Սիրիայի նախագահ՝ անցումային շրջանով, որը, ըստ նրա, կարող է տևել մինչև հինգ տարի: