ԱՄՆ նախագահ Դոնալդ Թրամփը հայտարարել է, որ Իրանը շուտով ստիպված կլինի համաձայնագիր կնքել Միացյալ Նահանգների հետ, հակառակ դեպքում «ինչ-որ բան տեղի կունենա»։ «Արմենպրես»-ի հաղորդմամբ՝ այս մասին նա ասել է մարտի 7-ին Սպիտակ տան Օվալաձև գրասենյակում՝ ընդգծելով, որ առաջիկայում բոլորը կլսեն այդ մասին։
«Դուք կլսեք այդ մասին, բայց նրանք ստիպված կլինեն համաձայնագիր կնքել»,-հավելել է Թրամփը՝ առանց մանրամասներ նշելու։
Թրամփի այս հայտարարությունը հնչել է այն բանից հետո, երբ Իրանի արտգործնախարար Աբբաս Արաղչին հայտարարել էր, որ Թեհրանը չի համաձայնի ԱՄՆ-ի հետ ուղիղ բանակցությունների, քանի դեռ Վաշինգտոնը շարունակում է առավելագույն ճնշման և սպառնալիքի քաղաքականությունը։
Ավելի վաղ ԱՄՆ նախագահը նշել էր, որ ցանկանում է Իրանի հետ բանակցել միջուկային գործարքի շուրջ և այդ նպատակով մարտի 6-ին նամակ էր ուղարկել Իրանի գերագույն առաջնորդ Ալի Խամենեիին։ Սակայն Թեհրանը մերժել էր երկխոսության հնարավորությունը՝ պնդելով, որ Վաշինգտոնը նախ պետք է դադարեցնի պատժամիջոցներն ու իր վրա գործադրվող ճնշումը։
