Ամերիկացի միլիարդատեր Իլոն Մասկը հայտարարել է, որ Starlink արբանյակային ծառայությունը կշարունակի գործել Ուկրաինայում։ Այդ մասին նա գրել է X սոցիալական ցանցում, որտեղ կիրակի վեճ էր սկսվել Մասկի, Լեհաստանի արտգործնախարար Ռադոսլավ Սիկորսկու և ԱՄՆ պետքարտուղար Մարկո Ռուբիոյի միջև։

Սկզբում միլիարդատերն ասել էր, որ իր Starlink համակարգը ներկայացնում է «ուկրաինական բանակի ողնաշարը», և եթե ծառայությունն անջատվի, ուկրաինական ճակատն ամբողջությամբ կփլուզվի։ Դրան ի պատասխան Լեհաստանի արտգործնախարար Սիկորսկին նշել էր, որ Starlink-ին Ուկրաինայի համար վճարում է Լեհաստանի թվային տեխնոլոգիաների նախարարությունը և Վարշավայի համար այն տարեկան արժենում է մոտ 50 միլիոն դոլար։ «Եթե պարզվի, որ SpaceX-ը հուսալի չէ, մենք ստիպված կլինենք ուրիշ մատակարարներ փնտրել»,- գրել է նա X սոցիալական ցանցում։

Մասկը կտրուկ արձագանքել է Սիկորսկու մեկնաբանությանը. «Լռիր, փոքրիկ մարդ, դու վճարում ես ծախսերի միայն մի փոքր մասը, Starlink-ին փոխարինող չկա»: Ավելի ուշ նա մեկ այլ գրառում է կատարել, որում շեշտել է, որ չնայած Կիևի քաղաքականության հետ իր անհամաձայնությանը՝ ինքը չի անջատի Starlink տերմինալները Ուկրաինայում և այն չի օգտագործի որպես ճնշման գործիք։

ԱՄՆ պետքարտուղար Մարկո Ռուբիոն էլ Սիկորսկուն մեղադրել է կեղծ տեղեկություններ տարածելու համար և խորհուրդ է տվել փոխարենը շնորհակալություն հայտնել, քանի որ, ըստ պետքարտուղարի՝ «առանց Starlink-ի Ուկրաինան վաղուց կպարտվեր, իսկ ռուսական զորքերը արդեն կլինեին Լեհաստանի հետ սահմանին»:

Միաժամանակ Եվրոպայում արդեն քննարկվում է Ուկրաինայում ամերիկյան Starlink-ն այլընտրանքային օպերատորով փոխարինելու հարցը։ Reuters-ի տվյալով ՝ ֆրանս-բրիտանական Eutelsat խումբը բանակցություններ է վարում Եվրամիության հետ, որպեսզի իր OneWeb արբանյակները հեռանկարում փոխարինեն Starlink-ին Ուկրաինայում: