Ադրբեջանի նախագահ Իլհամ Ալիևը հայտարարել է, որ Հայաստանի հետ բոլոր պայմանավորվածությունները պետք է ամրագրվեն փաստաթղթով։ Այս մասին նա ասել է Բաքվի գլոբալ ֆորումում, փոխանցում է Interfax-ը։
«Ես ձեզ մի բան էլ կարող եմ ասել՝ Հայաստանի նկատմամբ վստահության մակարդակը մոտ է զրոյականին։ Փաստաթղթեր են պետք, թղթեր»,- ասել է նա։
Նրա խոսքով՝ «մենք պետք է երաշխավորենք, որ Հայաստանի սահմանադրությունը տարածքային պահանջներ չպարունակի Ադրբեջանի նկատմամբ»։
«Դրանք դեռ կան։ Մեզ պետք է, որ ԵԱՀԿ Մինսկի խումբը լուծարվի։ Սա մեր ուղերձն է Հայաստանին, և մենք ասում ենք, որ Մինսկի խումբը պահպանելու տրամաբանություն չկա։ Այն ստեղծվել է Ղարաբաղի հարցը լուծելու համար։ Այսօր այս հարցը լուծված է։ Հայաստանը ճանաչում է Ղարաբաղը որպես Ադրբեջանի մաս։
Նա կարծում է, որ Հայաստանն իր գործողություններով ցանկանում է գործնականում պահպանել «իր դիրքերի մի մասը» տեղում։
