The Times-ի լրագրող Ջեյմս Գիրբրանտը հոդված է հրապարակել Հայաստանի ազգային հավաքականի նախկին ֆուտբոլիստ, Միլանի «Ինտերի» կիսապաշտպան Հենրիխ Մխիթարյանի մասին։
Լրագրողը խոսել է հայ ֆուտբոլիստի տաղանդի, նվիրվածության, ինչպես նաև ժամանակի հաղթահարման մասին, փոխանցում է Armsport.am-ը։
«Չեմպիոնների լիգայի շրջանակում «Ֆեյենորդի» նկատմամբ տարած հաղթանակի ժամանակ Մխիթարյանը փայլեց՝ շրջանցելով իրենից 15 տարով երիտասարդ խաղացողներին, կատարելով 50-յարդանոց փոխանցումներ, ինչպես նաև հաղթելով ամենաշատ մենապայքարները։Իտալական Sky-ի մեկնաբան, «Ինտերի» լեգենդար ֆուտբոլիստ Ջուզեպպե Բերգոմին նրան անվանել է «Խաղադաշտում լավագույնը»։
Հենրիխ Մխիթարյանի առջև բացվել է պատմական հնարավորություն։ «Ինտերը» պատրաստվում է Չեմպիոնների լիգայի քառորդ եզրափակչին «Բավարիայի» դեմ, իսկ հնարավոր կիսաեզրափակչում նրանց սպասում է «Բարսելոնան» կամ Մխիթարյանի նախկին ակումբը՝ «Բորուսիան»։
Եթե «Ինտերը» նվաճի Չեմպիոնների լիգայի գավաթը, Մխիթարյանը կդառնա առաջին խաղացողը, ով հաղթել է Եվրոպա լիգայում, Կոնֆերենցիաների լիգայում և Չեմպիոնների լիգայում։ Նա արդեն միակն է, ով խաղացել է այս երեք մրցաշարերի եզրափակիչներում։
36 տարեկանում Մխիթարյանը շարունակում է գրել իր անունը եվրոպական ֆուտբոլի պատմության մեջ։
