Ազատ Եվրոպա/Ազատություն ռադիոկայանը (Ազատություն ռադիոկայան) հաստատել է, որ ստացել է փաստաթուղթ ԱՄՆ կառավարությունից ֆինանսավորման դադարեցման մասին:
«Ազատություն» - «Ազատ Եվրոպա» ռադիոկայանի նախագահ Սթիվեն Կապուսը մեդիա կորպորացիայի կայքում հրապարակված հայտարարության մեջ պնդում է, որ դրամաշնորհային համաձայնագրի չեղարկումը «վիթխարի նվեր կլինի Ամերիկայի թշնամիներին»։
Այս մասին փոխանցում է ՏԱՍՍ-ը:
Մարտի 14-ին ԱՄՆ նախագահ Դոնալդ Թրամփը հրաման է ստորագրել, որով զգալիորեն կրճատվում է ԱՄՆ կառավարության Գլոբալ ԶԼՄ-ների գործակալության (USAGM) և պետական այլ գերատեսչությունների գործունեության շրջանակը։ USAGM-ն վերահսկում է «Ազատություն» ռադիոկայանի մեդիա կորպորացիան և «Ամերիկայի ձայնը» ռադիոկայանը:
USAGM փաստաթղթում խոսվում է «Ազատություն» ռադիոկայանին ֆինանսավորող ԱՄՆ Կոնգրեսի կողմից հաստատված դրամաշնորհի դադարեցման մասին։
Մինչդեռ Լրագրողների պաշտպանության կոմիտեն կոչ է արել ԱՄՆ Կոնգրեսի առաջնորդներին պաշտպանել USAGM-ն Թրամփի հրամանից։
USAGM կայքում ասվում է` այս գործողությունը կազդի USAGM-ի, Ամերիկայի ձայնի, Կուբայի հեռարձակման գրասենյակի և դրամաշնորհառուների գործակալության աշխատուժի վրա: USAGM-ի աշխատակիցների մեծ մասը, որոնց վրա ազդել է այս գործողությունը, կտեղափոխվեն վճարովի վարչական արձակուրդ՝ սկսած 2025 թվականի մարտի 15-ից և կմնան արձակուրդում մինչև հետագա ծանուցումը:
Փետրվարին Իլոն Մասկը, որը ղեկավարում է ԱՄՆ կառավարության արդյունավետության գրասենյակը, ԱՄՆ կառավարությանը կոչ արեց դադարեցնել «Ազատություն» ռադիոկայանի և «Ամերիկայի ձայն» ռադիոկայանի ֆինանսավորումը:
