Եվրոպայի խորհրդի տեղական և տարածքային իշխանությունների կոնգրեսը դատապարտել է Ստամբուլի քաղաքապետ Էքրեմ Իմամօղլուի ձերբակալությունը։
«Մենք խստորեն դատապարտում ենք Ստամբուլի՝ ժողովրդավարական ճանապարհով ընտրված քաղաքապետ Էքրեմ Իմամօղլուի ձերբակալությունը: Դրանում առկա են առաջիկա նախագահի ընտրությունում գլխավոր թեկնածուներից մեկը համարվող քաղաքական գործչի նկատմամբ ճնշման բոլոր նշանները:
Հատկանշական է, որ դա տեղի է ունեցել Ժողովրդահանրապետական կուսակցության կողմից Իմամօղլուին որպես նախագահի թեկնածու առաջադրելուց մի քանի օր առաջ: Ձերբակալությունը հետևել է Ստամբուլի համալսարանի որոշմանը՝ քաղաքապետ Իմամօղլուին զրկելու գիտական աստիճանից, որը նախագահի թեկնածուների համար պայմաններից մեկն է»,- ասված է Տեղական և տարածքային իշխանությունների կոնգրեսի նախագահ Մարկ Քուլսի հայտարարության մեջ:
Նշվում է նաև, որ երեք առանձին ընտրությունների ժամանակ Ստամբուլի բնակիչներն անվերապահորեն վստահություն են հայտնել քաղաքապետ Իմամօղլուին:
Հայտարարությունում նշվում է, որ Ստամբուլի քաղաքապետի ձերբակալության հարցը կքննարկվի Կոնգրեսի բյուրոյի նիստում մարտի 24-ին:
