Եկեղեցիների համաշխարհային խորհուրդը ՄԱԿ-ի Մարդու իրավունքների խորհրդի 58-րդ հերթական նստաշրջանում հայտարարություն է տարածել Ադրբեջանում հայ պատանդների իրավունքների վիճակի վերաբերյալ։

«Եկեղեցիների համաշխարհային խորհուրդը խորը մտահոգություն է հայտնում Ադրբեջանի կողմից Հայաստանի քաղաքացիների շարունակվող անօրինական ձերբակալությունների կապակցությամբ։ Պատանդ վերցնելն ու պահելը խախտում է միջազգային մարդասիրական իրավունքի հիմնարար սկզբունքները»։

Հայտարարության մեջ նշվում է, որ 2020 թվականի նոյեմբերից մինչև 2023 թվականի հոկտեմբերն Ադրբեջանն ապօրինի գերեվարել է առնվազն 23 հայի, այդ թվում՝ քաղաքացիական անձանց, պաշտոնյաների և զինվորականների։ Նրանցից շատերը ենթարկվել են խոշտանգումների և նվաստացնող վերաբերմունքի, ինչը փաստագրվել է իրավապաշտպան կազմակերպությունների կողմից:

«Մենք վերահաստատում ենք մեր պահանջը՝ անհապաղ և անվերապահ ազատ արձակել ապօրինի բերման ենթարկված բոլոր անձանց»։

Հայտարարությունը նաև կոչ է անում Մարդու իրավունքների խորհրդին ձեռնարկել բոլոր հնարավոր միջոցները՝ ապահովելու այս պատանդների ազատ արձակումը, և բոլոր կողմերին՝ կատարել միջազգային իրավունքով նախատեսված իրենց իրավական պարտավորությունները՝ պաշտպանելու մարդու արժանապատվությունը և ապահովելու արդարությունը: