Իրանի գերագույն առաջնորդի խորհրդական Ալի Լարիջանին հայտարարել է, որ եթե Միացյալ Նահանգները կամ Իսրայելը ռմբակոծեն Իրանը, Թեհրանը ստիպված կլինի շարժվել միջուկային զենքի ստեղծման ուղղությամբ: Նա հիշեցրել է, որ միջուկային գործարքից հրաժարվել է հենց ամերիկյան կողմը: Պաշտոնյան նշել է նաև, որ Իրանի դեմ ռազմական գործողություններն անհետևանք չեն մնա:  

Նա տեղեկացրել է, որ Օմանի միջոցով փոխանցված՝ Թրամփի նամակի բովանդակությունը գրեթե նույնն է, ինչ նրա մշտական հայտարարությունները՝ արտահայտված դիվանագիտական լեզվով:

Լարիջանիի խոսքով՝ ԱՄՆ-ի հետ անուղղակի բանակցություններ են ընթանում՝ կողմերի պահանջները և հնարավոր զիջումները հասկանալու համար:

Անդրադառնալով Եմենում հութիների վրա ամերիկյան հարձակումներին՝ Ալի Լարիջանի, ԱՄՆ-ին խորհուրդ է տվել «գործ չունենալ» նրանց հետ: Եթե եմենցիները հակամարտության մեջ մտնեն արաբական երկրների հետ, նրանք ծանր հարվածներ կհասցնեն նրանց՝ ասել է իրանցի պաշտոնյան: Նրա խոսքով՝ ի սկզբանե ամերիկյան կողմn է սկսել առճակատումը, և այժմ Եմենը պատասխանում է։