ԱՄՆ վարչակազմը Ադրբեջանի և Հայաստանի ղեկավարությանը ներկայացրել է իր առաջարկները՝ կապված խաղաղության համաձայնագրի շուրջ աշխատանքի շրջանակներում ամենավիճահարույց հարցերի լուծման հետ։

 

Այս մասին Ներկայացուցիչների պալատի արտաքին հարաբերությունների հանձնաժողովի լսումներին ասել է ԱՄՆ պետքարտուղարի Եվրոպայի և Եվրասիայի հարցերով օգնականի առաջին տեղակալ Դերեկ Հոգանը։

 

Նրա խոսքով՝ երկու երկրների բանակցային գործընթացում «առաջընթաց կա»։

 

«Մայիսի սկզբին պետքարտուղարը հանդիպել է երկու երկրների արտգործնախարարների հետ՝ աշխատելու մի շարք ամենավիճահարույց հարցերի շուրջ, ինչպիսիք են սահմանամերձ շրջանից զորքերի դուրսբերումը», - նշել է նա։

 

Մայիսի 1-ին Վաշինգտոնում բանակցություններ են տեղի ունեցել Ադրբեջանի և Հայաստանի արտգործնախարարներ Ջեյհուն Բայրամովի և Արարատ Միրզոյանի միջև՝ ԱՄՆ պետքարտուղար Էնթոնի Բլինքենի միջնորդությամբ։ Հոգանի խոսքով, այս հանդիպմանը եղել է «ինտենսիվ դիվանագիտական ​​փոխգործակցություն երկու կողմերի միջև»:

 

Նա նշել է, որ անցյալ շաբաթ խոսել է Ադրբեջանի և Հայաստանի արտգործնախարարների հետ՝ հասկանալու համար, թե «որ ոլորտներում կարող են առաջ շարժվել»։

 

Խոսելով հունիսի 1-ին Մոլդովայի մայրաքաղաք Քիշնևում Ադրբեջանի և Հայաստանի ղեկավարների միջև սպասվող հանդիպման մասին՝ Հոգանը նշել է, որ «կենտրոնանան այն ամենի վրա, ինչ պետք է արվի, որպեսզի գործն ավարտվի»: