Հավատքի առաջնորդները և իրավապաշտպան խմբերը դատապարտել են Վատիկանի համալսարանի որոշումը՝ հյուրընկալել Ադրբեջանի պետական հովանավորությամբ համաժողով՝ պնդելով, որ միջոցառումը հարթակ է առաջարկել ադրբեջանցի պատմական ռևիզիոնիստներին, որոնք փորձում են ջնջել հայկական պատմությունը «երկու երկրների միջև վիճելի տարածքներից»: Այս մասին ասված է  The Christian Post-ի հայտարարության մեջ։

Ամերիկայի Հայ Առաքելական Եկեղեցու Արևելյան թեմի արքեպիսկոպոս Վիգեն Այկազյանը նշել է, որ «Քրիստոնեությունն Ադրբեջանում. պատմություն և արդիականություն» միջոցառման պատճառը փողն է։

The Pillar-ին տված հայտարարության մեջ Այկազյանը հայտարարել է, որ Ադրբեջանի կողմից Վատիկանի նախագծերի ֆինանսավորումն ազդել է Հայաստանի հետ երկրի շարունակական հակամարտության նկատմամբ նրա մոտեցման վրա: Արքեպիսկոպոսի խոսքով՝ որոշ կարդինալներ և Վատիկանի պաշտոնյաներ ֆինանսավորում են ստացել Ադրբեջանից։

The Christian Post-ի հարցմանն ի պատասխան՝ Հայրապետական Գրիգորյան համալսարանի խոսնակն ընդգծել է, որ հաստատությունը ներգրավված չի եղել միջոցառման կազմակերպման մեջ, ոչ էլ «հովանավորություն կամ համագործակցություն է տվել»:

«Դրա անցկացումը այս վայրում պայմանավորված էր զուտ լսարանի վարձակալությամբ»։

Բաքվի մուլտիկուլտուրալիզմի միջազգային կենտրոնն անմիջապես չի արձագանքել The Christian Post-ի մեկնաբանության խնդրանքին:

Ցուցադրության մեջ ներառված էր Ադրբեջանի կառավարության պնդումը, թե հայկական վանքը պատկանում է «կովկասյան ալբանական» մշակույթին։

Այս ամսվա սկզբին Artsakh Monument Watch-ի դիտորդական խումբը, որը անկախ ակադեմիական հարթակ է, հավելյալ մտահոգություն է հայտնել համաժողովի վերաբերյալ՝ պնդելով, որ կազմակերպիչները միջոցառումը կազմակերպել են գաղտնի:

Համաժողովի մի քանի մասնակիցներ ադրբեջանական քարոզչությունը տարածելու պատմություն ունեն՝ ըստ դիտորդական կազմակերպության: Համաժողովի մասնակիցներից մեկը ռուս հոգևորական վարդապետ Ալեքսին է (Անդրեյ Վ. Նիկոնորով):

Ինչպես նշվել է, հոգևորականն աչքի է ընկել հակահայկական հայտարարություններ անելով, այն էլ՝ ներկայանալով որպես գիտնական։

«Պատմության մեջ «բանիմաց» ռուս հոգևորականը, ով պաշտպանում է նաև ուղղափառության շահերը, կարծես թե, նորմալ է համարում Շուշիի հայկական եկեղեցիների ուղղափառ հռչակումը, իսկ խորհրդային տարիներին ավերված ռուսական եկեղեցիների մասին լռում է։ Իր որոշ հայտարարություններում նա նաև կասկածելի մտքեր է հայտնում Հայ առաքելական եկեղեցու մասին»,- հայտարարել է դիտորդական խումբը։