Ազատության հրապարակում տեղադրված վրանն իր առաջ դրված խնդիրը կատարել է։ Արցախցիների իրավունքների պաշտպանության խորհրդի անդամներն ընդունել են Արցախի նախագահ Սամվել Շահրամանյանի առաջարկը՝ և որոշել են  հանել Ազատության հրապարակում տեղադրված վրանը և գործունեություն կծավալեն Արցախի ներկայացուցչությունում։ Այս մասին այսօր հրավիրված ասուլիսի ընթացքում ասաց խորհրդի անդամ Նժդեհ Իսկանդարյանը։

«Վաղը կառավարության նիստի ժամանակ երկու ամսով երկարաձգելու են 40 000-ական աջակցության ծրագիրը, ընդունելու են այն պահանջները, որոնք խորհուրդը ներկայացրել է կառավարությանը։ Մենք գրավոր ներկայացրել ենք բոլոր կետերը, որոնք, ըստ մեզ, բարելավման կարիք ունեն։ Առաջին հերթին դա վերաբերում է բնակարանային ծրագրին։ Առաջիկա 10 օրերի ընթացքում խորհուրդը հանրությանը կներկայացնի կատարված աշխատանքները»,–ասել է Իսկանդարյանը։

 Նրանք հայտնեցին, որ արցախցիները կարող են դիմել իրենց, իրենք կհավաքագրեն խնդիրները և կփորձեն լուծում տալ դրանց, անհրաժեշտության դեպքում վրաններ էլ կտեղադրվեն, հանրահավաք էլ կարվի։