Կանանց համար պարտադիր զինվորական ծառայության ժամկետը սահմանվելու է 6 ամիս։ Զորակոչված իգական սեռի ներկայացուցիչները կնշանակվեն ուսումնական զորամասերում ու նրանց ծառայությունը կկազմակերպվի բացառապես այդ զորամասերում։ Այս մասին հայտարարել է պաշտպանության նախարար Սուրեն Պապիկյանը։

 Նա նշեց՝ ընթանում է առանձին զորամասի տեսքով կանանց գումարտակի ձևավորման գործընթաց, որի վարչակազմը լինելու են պայմանագրային զինծառայության մեջ գտնվող կանայք։

Պարտադիր զինվորական ծառայության 6-ամսյա ժամկետը լրանալու կամ մինչև լրանալը առողջական վիճակի պատճառով վաղաժամկետ զորացրվելու դեպքում լինելու է պատվովճար․ 6 ամիս ծառայելու դեպքում այն կկազմի 1 միլիոն դրամ։

1 միլիոն դրամ պատվովճար կտրամադրվի, եթե ծառայությունն ամբողջությամբ ավարտվել է, իսկ եթե առողջական խնդիրներով ժամկետից շուտ զորացրում է եղել, կբաժանվի 6 ամիսների վրա ու կհաշվվի ծառայած ամիսների չափով։

Կանայք իրավունք կունենան նաև 6-ամսյա ժամկետի լրանալու հիմքով զորացրվելու փոխարեն «Պաշտպան հայրենյաց» ծրագրով դիմել և անցնել 5 տարի ժամկետով պայմանագրային զինծառայության։