ԱՄՆ նախագահ Դոնալդ Թրամփը չի ցանկանում սրել ռազմական գործողությունները Մերձավոր Արևելքում, սակայն պատրաստ է անհրաժեշտության դեպքում մեծացնել Վաշինգտոնի ռազմական ներգրավվածությունը, հաղորդում է CNN-ը՝ հղում անելով Սպիտակ տան բարձրաստիճան պաշտոնյային։

Ավելի վաղ Իսլամական Հանրապետության զինված ուժերը հայտնել էին, որ Իրանը հրթիռային հարձակում է իրականացրել Կատարում գտնվող ամերիկյան բազայի վրա։

«Թրամփի վարչակազմը սպասում էր, որ Թեհրանը կպատասխանի ԱՄՆ-ի կողմից շաբաթավերջին Իրանի միջուկային օբյեկտներին հարվածներին, և նախագահը չի ցանկանում ավելի շատ ռազմական ներգրավվածություն տարածաշրջանում։ Թրամփը պատրաստ է անհրաժեշտության դեպքում մեծացնել ԱՄՆ ռազմական ներգրավվածությունը», - հաղորդել է հեռուստաալիքը։

Հունիսի 22-ի գիշերը ԱՄՆ-ն հարվածել է Իրանի երեք միջուկային օբյեկտների՝ Նաթանզի, Ֆորդոյի և Սպահանի։ Հարձակումը, ըստ Վաշինգտոնի, նախատեսված էր Իրանի միջուկային ծրագիրը ոչնչացնելու կամ լրջորեն թուլացնելու համար։

Ըստ ԱՄՆ նախագահ Դոնալդ Թրամփի, Թեհրանը պետք է համաձայնի «ավարտել այս պատերազմը», հակառակ դեպքում Իրանը կբախվի շատ ավելի լուրջ հետևանքների։ Միևնույն ժամանակ, ԱՄՆ փոխնախագահ Ջ.Դ. Վենսը հարձակումներից հետո, որոնք Իրանը անվանել է բարբարոսական և հանցավոր, ասել է, որ Միացյալ Նահանգները պատերազմի մեջ չէ Իսլամական Հանրապետության հետ։

Իրանի արտաքին գործերի նախարար Աբբաս Արաղչին ասել է, որ «դիվանագիտության դուռը միշտ պետք է բաց լինի, բայց հիմա... այդպես չէ»։ Նրա խոսքով՝ հենց Միացյալ Նահանգներն է դավաճանել դիվանագիտությանը։ Նա եզրակացրել է, որ Իրանը կձեռնարկի բոլոր միջոցները՝ իր անվտանգությունը և երկրի շահերը պաշտպանելու համար։

Իրանի ատոմային էներգիայի կազմակերպությունը հայտարարել է, որ Իրանի միջուկային արդյունաբերության զարգացումը չի դադարեցվի։
ԱՄՆ-ի հարձակումը բացասական արձագանք է առաջացրել միջազգային մակարդակում։