Կորոնավիրուսի համավարակի ընթացքում կատարված չարաշահումների գործով կհարցաքննվի Առողջապահության նախկին նախարար Արսեն Թորոսյանը։ Այս մասին լրագրողների հետ զրույցում ասել է Հակակոռուպցիոն կոմիտեի նախագահ Սասուն Խաչատրյանը։

«Հարցաքննության կարիքը կա, կհարցաքննենք, որովհետև Արսեն Թորոսյանն է զբաղեցրել Առողջապահության նախարարի պաշտոնը։ Պարոն Թորոսյանը պետք է իր վերաբերմունքը ցույց տա այդ իրողությունների վերաբերյալ, քննությունն էլ մի շարք հարցեր ունի»,- ասել է նա:

Հիշեցնենք, որ կորոնավիրուսի համավարակի ընթացքում կատարված չարաշահումների գործով ձերբակալվել էր այդ ժամանակ առողջապահության նախարարի տեղակալի պաշտոնը զբաղեցրած Գևորգ Սիմոնյանը (արդեն ազատ է արձակվել), իսկ  «Մեդլայն» բժշկական կենտրոնի տնօրեն Բաբկեն Շահումյանի և «Թոքաբանության ազգային կենտրոնի» դեղակայուն բաժանմունքի վարիչի նկատմամբ ընտրվել էր այլընտրանքային խափանման միջոց տնային կալանքը։

Վերոնշյալի կապակցությամբ Արսեն Թորոսյանը հայտարարությամբ էր հանդես եկել՝ նշելով, որ իր համար տարօրինակ է, որ մինչ այդ օրը ինքն ու Առողջապահության նախարար Անահիտ Ավանեսյանը չեն հարցաքննվել։