Ադրբեջանի արտգործնախարարն աշխատանքային այցով մեկնել է Թբիլիսի, նրան ընդունել է Վրաստանի արտաքին գործերի նախարարը: Ջեյհուն Բայրամովը և Մակա Բոճորիշվիլին քննարկել են երկկողմ գործակցության հիմնական ոլորտները, այդ թվում՝ էներգետիկան, տրանսպորտը, տարածաշրջանային կապերը, երկկողմ և բազմակողմ շփումների ընդլայնման հեռանկարը, ինչպես նաև տարածաշրջանային և միջազգային անվտանգության հարցեր։
Բանակցություններից հետո մամուլի ասուլիսում Բայրամովն անդրադարձել է Հայաստան-Ադրբեջան հարաբերություններին, նշել, որ խաղաղության լավ հեռանկար կա: Նրա խոսքով՝ մեծ նշանակություն ունեն երկու երկրի հասարակությունների միջև վստահության ամրապնդմանն ուղղված միջոցառումները: «Երբ խոսում ենք հետհակամարտային կարգավորման մասին, բոլորս հասկանում ենք, որ այդ խնդիրը չի կարող լուծվել մեկ օրում կամ կարճ ժամանակահատվածում»,- շեշտել է ադրբեջանցի դիվանագետը, հավելել՝ հարկավոր է նաև շարունակել երկկողմ հանդիպումները:

Խոսելով խաղաղության պայմանագրի հնարավոր ստորագրման մասին՝ Ջեյհուն Բայրամովը կրկին հայտարարել է, թե Հայաստանի սահմանադրությունը Ադրբեջանի նկատմամբ տարածքային պահանջներ է պարունակում, ուստի այն պետք է փոխվի: «Նաև պետք է լուծարվի Մինսկի խումբը»,- նշել է Ադրբեջանի արտգործնախարարը: