Բելառուսը պատրաստ է առաջիկա ժամերի ընթացքում վերսկսել աշխատանքը Լիտվայի հետ սահմանային անցակետերում։ Ինչպես հաղորդում է «Արմենպրես»-ը՝ վկայակոչելով բելառուսական «Բելտա» գործակալությունը, այս մասին հայտարարել է երկրի նախագահ Ալեքսանդր Լուկաշենկոն։

«Ուզում եմ հայտարարել, որ մենք պատրաստ ենք սահմանի բացմանը։ Մենք այն չենք փակել։ Մի քանի ժամվա ընթացքում այն մեր կողմից կարող է վերսկսել աշխատանքը։ Սահմանապահները պատրաստ են դրան»,- ասել է նա։ 

Լուկաշենկոն չի բացառել, որ Բելառուսի տարածքում մնացած լիտվական բեռնատարները կարող են առգրավվել, եթե դրանց հետ կապված իրավիճակը չկարգավորվի։ Նրա խոսքով՝ լիտվական բոլոր մեքենաները հավաքված են և գտնվում են հսկողության տակ։ «Տրանսպորտային միջոցները հավաքվել են և հսկողության տակ են։ Դրանք պահողները, կարծեմ, օրական 120 եվրո են խնդրել։ Բազմապատկեք այնտեղ կանգնելու օրերի քանակը 120 եվրոյով։ Վճարեք և վերցրեք տրանսպորտային միջոցները և դրանց բեռը։ Եթե դա չարվի առաջիկա մի քանի օրերի ընթացքում, մենք որոշում կկայացնենք մեր օրենքներին համապատասխան, ընդհուպ մինչև տրանսպորտային միջոցների բռնագրավումը։ Դրանք չեն կարող ճանապարհներին մնալ», - ասել է Լուկաշենկոն՝ նշելով, որ խոսքը հազարից ավելի բեռնատարների մասին է։