Հաճույքով եմ ուզում արձանագրել, որ 2026-ի հունվարին մենք զբոսաշրջության բացարձակ ռեկորդ ենք ունեցել բոլոր ժամանակների հունվար ամսվա համեմատությամբ: Այդ մասին Կառավարության՝ փետրվարի 12-ի նիստին ասաց վարչապետ Նիկոլ Փաշինյանը:

Էկոնոմիկայի նախարար Գևորգ Պապոյանը մանրամասնեց, որ նախորդ տարի՝ մայիսից սկսած, միայն սեպտեմբեր ամիսն է եղել, որ բոլոր այդ ամիսների մեջ 2025 թվականի ցուցանիշը լավագույնը չի եղել, սեպտեմբերի դեպքում 2023-ի սեպտեմբերին է եղել:

Փաշինյանը նշեց, որ հաճույքով է արձանագրում, որ 2025 թվականն առաջին տարին է, երբ Հայաստան վերադարձած ՀՀ քաղաքացիների թիվը շուրջ 8600-ով ավելին է, քան Հայաստանից մեկնած քաղաքացիների թիվն է:

«Սա նշանակում է, որ 2025-ի արդյունքներով արտագաղթը փոխարինվել է ներգաղթով: Բայց, բացի ՀՀ քաղաքացիներից, մենք տեսնում ենք նաև զբոսաշրջային հոսքերի շատ մեծ փոփոխություն, որովհետև 2025-ի արդյունքներով այդ թվում օտարերկրյա քաղաքացիների ներհոսքը 23 հազարով գերազանցել է նախորդող շրջաններին, այսինքն՝ ամենաշատ թվով այցելուներն ենք ունեցել: Դա տեսանելի էր նաև Ամանորի տոնակատարությունների ժամանակ»,- ասաց նա՝ նշելով, որ այսուհետ Ամանորի տոնակատարությունները պետք է դիտարկել որպես զբոսաշրջային ապրանք: