Արդեն ձևավորվում է մի դաշտ, երբ լինելու են խոշոր ընդդիմադիր միավորներ և մեկ իշխանական միավոր։ Այս մասին այսօր՝ մարտի 21-ին, աշտարակցիների հետ հանդիպմանն ասել է ՀՀ երկրորդ նախագահ Ռոբերտ Քոչարյանը։

«Այս պահին բոլորը դիրքավորվում են, թե ինչ ծրագրերով և ընդհանրապես ինչպես են հանդես գալու մեր ժողովրդի առջև այս նախընտրական փուլում։ Մեր գլխավորումը դուք արդեն տեսել եք։ Ի՞նչն է դրական այս ամբողջ գործընթացում. և սա չափազանց կարևոր է, որովհետև մենք վերջին մի քանի ամսվա ընթացքում անընդհատ խոսում էինք դրա մասին, որ պետք է ձևավորել խոշոր ընտրական միավորներ, ոչ թե մասնակցել, օրինակ, ընդդիմադիր դաշտից 20-25 տարբեր կուսակցություններ կամ դաշինքներ։

Ըստ էության, այս գործընթացը գնում է, և սա ես բավական դրական եմ համարում, որովհետև սա հնարավորություն է տալիս առաջին հերթին չփոշիացնել ձայները, և երկրորդը, հնարավորություն է տալիս ավելի հստակ ծրագրերով երեք-չորս ընդդիմադիր միավորներով մտնել լուրջ պայքարի մեջ մեկ միավորի դեմ, միավորի, որը զավթել է իշխանությունը և որը մեզ տանում է, ոչ ոք չի հասկանում թե ուր, կարծում եմ՝ իրենք էլ չեն հասկանում։

Դրականը նաև այն է որ իշխանությունը սատարող կուսակցություններ չունի, որոնք ինչ-որ ձևով նույնիսկ տեսական հնարավորություն ունեն հաղթահարել այդ չորս տոկոսանոց նախընտրական շղթան։ Ուրեմն արդեն ձևավորվում է մի դաշտ, երբ լինելու են խոշոր ընդդիմադիր միավորներ և մեկ իշխանական միավոր։

Եվ եթե այդ ընդդիմադիր դաշտը համակարգված աշխատի, եթե իրար դեմ չաշխատեն, այլ բոլորս թիրախավորենք նրան, ովքեր արհավիրք են բերել Հայաստանի Հանրապետության գլխին, ապա վստահությունը իմ մոտ շատ մեծ է, որ հաջողություն անպայման ունենալու ենք»,- իր խոսքում նշել է երկրորդ նախագահը։

Բայց մենք սա կանխատեսում էինք, եթե հիշում եք, մեր մեր հրապարակային ելույթներում միշտ ասում էինք, որ սա միակ թեզն է, որից այս իշխանությունը փորձելու է կառչել և ինչ-որ ձև վախի մթնոլորտ սերմանելով, պատերազմից վախի մթնոլորտ ստեղծելով փորձել է ինչ-որ ձայներ ստանալ։ Ես համոզմունք ունեմ, որ մի քանի անգամ ասել եմ, կրկնեմ, որ եթե մեկը քեզ խաբել է, մեկ անգամ ամոթ քեզ, եթե խաբել է, երկրորդ անգամ՝ ամոթ քեզ. իսկ մեր ժողովուրդը ուղղակի թույլ չի տալու, որ իրեն խաբեն 100 երրորդ անգամ»։