Ձերբակալվել է ՌԴ հատուկ ռազմական օպերացիայի գոտում զորքերի խմբավորման հրամանատարի տեղակալ Սերգեյ Սուրովիկինը, հայտնում է Financial Times-ը:
Աղբյուրը նշում է, որ Սուրովիկինի կալանավորումը հավանաբար կապված է «Վագներ» խմբավորման գործողությունների, մասնավորապես ընդհատված ապստամբության հետ, որի նախապատրաստման մասին, ըստ աղբյուրի, գեներալը տեղյակ է եղել։
Այսօր ավելի վաղ նախագահի մամուլի քարտուղար Դմիտրի Պեսկովը, պատասխանելով Սուրովիկինի շուրջ ստեղծված իրավիճակի վերաբերյալ լրագրողների հարցերին, խորհուրդ է տվել կապ հաստատել պաշտպանության նախարարության հետ։
Հարցին, թե նախագահ Վլադիմիր Պուտինը շարունակո՞ւմ է վստահել Սուրովիկինին, Պեսկովը պատասխանել է, որ գերագույն հրամանատարն աշխատում է պաշտպանության նախարարի և գլխավոր շտաբի պետի հետ։
Պրիգոժինի պլանների մասին Սուրովիկինի հնարավոր իմացության մասին ավելի վաղ հայտնել էր The New York Times-ը՝ վկայակոչելով հետախուզության տվյալներին ծանոթ անանուն ամերիկացի պաշտոնյաներին:
Սուրովիկինն այն ռազմական գործիչներից էր, ով «արդարության երթի» մասին Պրիգոժինի հայտարարությունից հետո դիմեց «Վագներ»-ի մարտիկներին։
«Մենք միասին կռվեցինք, ռիսկի դիմեցինք, միասին հաղթեցինք: Մենք նույն արյունից ենք, մենք մարտիկներ ենք։ Կոչ եմ անում դադարեցնել»,- ասել է Սուրովիկինը: