«Չնայած առանձին միջադեպերին, վերջին երկու տարիների ընթացքում սահմանին զոհեր չեն եղել, կրակոցների թիվը հասել է զրոյի, և Ադրբեջանի հետ տնտեսական հարաբերությունները հաստատում են, որ մենք շարժվում ենք դեպի կայուն խաղաղություն»։ Այս մասին NEWS.am-ի հետ զրույցում հայտարարել է Հայաստանի Անվտանգության խորհրդի քարտուղար Արմեն Գրիգորյանը:

Մեկնաբանելով Մարտակերտի շրջանում հայկական գերեզմանների պղծման փաստերը և Արցախում հուշարձանների ոչնչացումը՝ Գրիգորյանը խոստովանել է, որ «նման բան տեսնելը հաճելի չէ», սակայն կոչ է արել խաղաղությունը դիտարկել ոչ թե որպես մեկանգամյա իրադարձություն, այլ որպես տևական գործընթաց։ Նա նշել է, որ թեև նման դեպքերը չեն նպաստում վստահության ամրապնդմանը, կան այլ գործոններ, որոնք մատնանշում են առաջընթացը, օրինակ՝ կայուն կյանքը սահմանամերձ համայնքներում։ ԱԽ քարտուղարն ընդգծել է, որ այսօր առաջնահերթությունը խաղաղության օրակարգի առաջմղումն ու Հայաստանի շուրջ անվտանգ միջավայրի ստեղծումն է։

Պատասխանելով հարցին, թե արդյոք իր համար «Արցախի էջը փակված է», քաղաքական գործիչը խուսափել է ուղղակի պատասխանից և մատնանշել տարածքային ամբողջականության փոխադարձ ճանաչման վերաբերյալ ձեռք բերված պայմանավորվածությունները։ Նա շեշտել է, որ այս պահին խաղաղության պայմանագիրն արդեն նախնական համաձայնեցված է, և իշխանությունները ձեռնարկում են բոլոր անհրաժեշտ քայլերը դրա ստորագրումն իրականություն դարձնելու համար։ Գրիգորյանն ամփոփել է, որ անհրաժեշտ է կենտրոնանալ այս ուղղությամբ աշխատանքի վրա՝ չնայած կարգավորման գործընթացում առկա խնդիրներին։