Ակցիզային  հարկի փոփոխությունները վերաբերվում են ընդամենը գնաճի ճշգրտումներին, այս մասին ԱԺ-ում լրագրողների հետ ճեպազրույցում ասաց Ֆինանսների նախարար Վահե  Հովհաննիսյանը՝ պարզաբանելով, թե ինչու է ընտրություններից անմիջապես հետո բարձրանում ակցիզային հարկը: Ըստ նրա՝ ակցիզային հարկը բարձրանում է 3 տոկոսով:

«Մի քանի տարի առաջ ներկայացրել էինք ակցիզային հարկի փոփոխությունների պլան, որն ավարտվում է 2026 թվականի դեկտեմբերի 31-ին: Մենք պետք է ներկայացնենք նոր պլան, որը կվերաբերվի 2027 թվականի հունվարի 1-ից հետո ընկած ժամանակահատվածին: Այսինքն՝ չի կարող այդ պլանը չլինել»,- մեկնաբանեց նախարարը:

Մինչդեռ Հովհաննիսյանի խոսքով՝ որոշ ապրանքատեսակների դեպքում ակցիզային հարկի նվազեցում կա, օրինակ, մրգօղիների և կոնյակի դեպքում:

Հիշեցնենք՝ կառավարությունը հավանություն է տվել օրենսդրական նախաձեռնության, որով առաջարկվում է վերանայել ակցիզային հարկով հարկվող ապրանքների համար սահմանված ակցիզային հարկի դրույքաչափերը: Արդյունքում կթանկանան ծխախոտը, ալկոհոլը, դիզվառելիքը, բենզինը: