Մենք երրորդ կողմ ենք, մենք դիրքորոշում ենք ներկայացնում, իսկ հետևություններն անելու է դատարանը, ուստի պետք է սպասենք դատարանի հետևություններին: Այս մասին այսօր՝ հունիսի 30–ին, ՍԴ շենքի դիմաց լրագրողների հետ զրույցում նշեց ՀՀ արդարադատության նախարար Սրբուհի Գալյանը, ով ՍԴ–ում ՔՊ–ի ներկայացուցչն է։

Հարցին՝ ինչպե՞ս է գնահատում դիմող ուժերի կողմից ներկայացված փաստարկները, նա պատասխանեց. «Դրանց անդրադարձել ենք մեր դիրքորոշումներում և մեր կողմից բարձրացված հարցերում։ Իրականում տարբեր են քաղաքական ուժերի կողմից ներկայացված փաստարկները: «Ուժեղ Հայաստան», «Հայաստան» դաշինքների, «Բարգավաճ Հայաստան» կուսակցության ներկայացուցիչների կողմից ներկայացված փաստարկները գրեթե նույնանում են, նրանց է միանում ինչ-որ առումով նաև «Միասնության թևերը»։ Այ մյուս երկու ուժերի հետ կապված՝ «Հանուն Հանրապետության» և ԴՕԿ կուսակցության ներկայացուցիչների փաստարկները բովանդակային առումով տարբերվում են իմ կողմից վերը նշված մյուս ուժերի ներկայացրած փաստարկներից։

Ինչու՞ եմ սա նշում, որովհետև կախված այդ փաստարկների բովանդակությունից մեր դիրքորոշումը դրանց մասով տարբեր է։ Օրինակ, «Հանուն Հանրապետության» և ԴՕԿ կուսակցության ներկայացուցիչներն ասում են, որ ընտրակաշառք է եղել, ծավալները բավականին մեծ են եղել։ Մենք միանշանակ այս փաստարկների հետ համաձայն ենք և միայն մի կետում իրենց հետ կարելի է ասել՝ համաձայն չենք, որ դրանք կարող էին հանգեցնել ընտրության արդյունքների անվավերության։

Մենք ասում ենք, որ անվավերության հանգեցնող հիմքեր առհասարակ որևէ մեկի կողմից ներկայացված փաստարկներում առկա չեն»։