Այսօր Երևանի քաղաքապետարանի գործակարգավարական խորհրդակցության ընթացքում փոխքաղաքապետ Տիգրան Ավինյանը, խոսելով Մերգելյանի այգու մասին, ասաց, որ իրենք ունեին այգու երկու նախագիծ, և քվեարկության արդյունքում հաղթել է երկրորդ տարբերակը։
«Բայց, հաշվի առնելով մեր ակտիվ քաղաքացիների մեկնաբանությունները, Մերգելյանի այգու մի փոքր այլ տարբերակ ենք ունենալու, քանի որ առաջարկվում է երկրորդ նախագծով, և, մասնավորապես, սրճարանի ծավալներն էականորեն կրճատվում են՝ մոտավորապես 50 տոկոսով, հնարավորինս ավելացնում ենք կանաչապատ հատվածները, ինչպես և պահանջել են երևանցիները, և կարծում եմ՝ շատ բնական, նորմալ պահանջներ էին, որոնք մենք հանձն ենք առնում իրականացնել»,-ասաց Ավինյանը։
Ապա նա հորդորեց մաքսիմալ արագ անել շինթույլտվության և մնացածի հետ կապվաժ հարցերը՝ հավելելով․ «Այո, 30 տարի մսի պասաժներով գործող Մերգելյանի այգին վերջապես այս տարվա ընթացքում կստանա այգու տեսք, շատ գեղեցիկ այգու տեսք, և կարծում եմ՝ կդառնա երևանցիների սիրելի վայրերից մեկը, և խնդրում եմ՝ էդ գործընթացում հնարավորինս աջակցել շինարարներին»։