Հունաստանում հրշեջները փորձում են զսպել 82 անտառային հրդեհ ամբողջ երկրում, որոնցից 64-ը բռնկվել են նախորդ կիրակի օրը։ Հրդեհների պատճառով տարհանված տեղի բնակիչների և զբոսաշրջիկների ընդհանուր թիվը մոտենում է 30 հազարի։ Միաժամանակ իշխանությունները նշում են, որ հունական կղզիներում հանգստացողներին լուրջ վտանգ չի սպառնում։  Հրդեհները բռնկվել են Հունաստանում հաստատված ամենաուժեղ շոգի ֆոնին։ Հռոդոս կղզում 19 հազար մարդ ստիպված է եղել տարհանվել. հանգստյան օրերին հրդեհը հասել է հարավարևելյան ափի հանգստավայրեր։  Բացի Հռոդոսից, անտառային հրդեհներ են բռնկվել նաև Եվբեա և Կորֆու կղզիներում։

Եվբեա կղզում իշխանությունները տարհանել են չորս գյուղի բնակիչներին Կարիստոս քաղաք։ Իշխանությունները նաև կոչ են արել տարհանել Կորֆուի որոշ շրջանների բնակիչներին և հայտնել, որ կրակը «շարժվում է դեպի կղզու հարավ-արևելք՝ լայն ճակատով»։  Անցած գիշեր կղզուց ծովով տարհանվել է մոտ 2500 մարդ՝ գործողությանը մասնակցել են առափնյա պահպանության նավերն ու մասնավոր նավերը։

Պելոպոնեսի հյուսիս-արևելքում գտնվող Էպիդաուրուս հնավայրից դեպի արևմուտք (որտեղ գտնվում է հայտնի հնագույն թատրոնը) բռնկված հրդեհը մասամբ մարվել է։ Հունաստանի կլիմայական ճգնաժամի և քաղաքացիական պաշտպանության նախարարությունը հայտնել է, որ Հռոդոս կղզում արտակարգ դրությունը հանգեցրել է պատմության մեջ ամենամեծ տարհանմանը անտառային հրդեհի պատճառով: Տեղի ոստիկանության տվյալներով՝ 12 բնակավայրերից ու մի քանի հյուրանոցներից ցամաքով տարհանվել է 16 հազար մարդ, իսկ ծովով՝ 3 հազարը։ Հյուրանոցներն ու բնակելի շենքերը հրդեհից չեն տուժել։

Tui և Jet2 ավիաընկերությունները չեղարկել են թռիչքները դեպի Հռոդոս առաջիկա օրերին և դատարկ ինքնաթիռներ ուղարկել կղզի՝ զբոսաշրջիկներին այդտեղից հեռացնելու համար։ Հունաստանի ենթակառուցվածքների և տրանսպորտի նախարարությունը ավելի ուշ հայտարարել է, որ երկուշաբթի օրը Հռոդոսի օդանավակայանից թռիչքներ կկատարեն 14 Tui և Jet2 չվերթ՝ 2700 ուղևորներով։ Այլ ավիաընկերությունները, այդ թվում՝ Easyjet-ը, Ryanair-ը և British Airways-ը, հայտնել են, որ իրենք աշխատում են սովորական ռեժիմով, և հաճախորդները կարող են անվճար փոխել վերադարձի ամսաթիվը՝ ավելի վաղ վերադառնալու կամ արձակուրդը հետաձգելու համար: Նրանք հայտարարել են նաև հայրենադարձության թռիչքներ կազմակերպելու մտադրության մասին։ Հունաստանի արտաքին գործերի նախարարությունը հայտարարել է, որ Ռոդսի միջազգային օդանավակայանում գործարկվել է զբոսաշրջիկների աջակցության ծառայություն։

Հունաստանի զբոսաշրջության նախարար Օլգա Կեֆալոգիանին ասել է, որ Կորֆուում իրավիճակը մտահոգիչ չէ և բոլորովին նման չէ Հռոդոսում ստեղծված իրավիճակին։   Չնայած կառավարության պնդումներին, որ պատմության մեջ ամենամեծ տարհանումը տեղի է ունեցել Հռոդոսում, Կեֆալոգիաննին կարծում է, որ զբոսաշրջիկները կարող են շարունակել հանգստանալ ինչպես Կորֆուում, այնպես էլ Հռոդոսում: «Օդանավակայանի շահագործման մեջ խափանումներ չեն եղել, և հատկապես կարևոր է ընդգծել, որ տուժել է Հռոդոս կղզու միայն մի փոքր մասը», - ասաց նա:

Կիրակի օրը Հունաստանի 180 վայրերում օդի ջերմաստիճանը հասել է Ցելսիուսի 40 աստիճանի։ Ամենաբարձր ջերմաստիճանը՝ 46,4 °C, գրանցվել է Պելոպոնեսի հարավային մասում գտնվող Յիթյոն քաղաքում։ Երկուշաբթի օրը ջերմաստիճանը իջել է մինչև 38 աստիճան։ Առաջիկա երեք օրերը շոգ են լինելու, սակայն շաբաթվա վերջին, ըստ երկրի օդերևութաբանական ծառայության, ջերմաստիճանը պետք է իջնի մինչև մոտ 30 աստիճան։

«Սա դժվարին պայքար է և կշարունակվի այնքան ժամանակ, քանի դեռ պայմաններն այսպիսին են: Մենք պատերազմի մեջ ենք կրակի հետ, և կվերականգնենք կորցրածը, փոխհատուցում կվճարենք բոլոր տուժածներին»,- խորհրդարանում ելույթի ժամանակ ասել է Հունաստանի վարչապետը։