Եթե կան խնդիրներ, դրանք բոլորինս են, մանավանդ, եթե վերաբերում են բանակին․ այս մասին այսօր ԱԺ պաշտպանության հարցերի հանձնաժողովի նիստին ասաց Պաշտպանության նախարար Սուրեն Պապիկյանը՝ անդրադառնալով բանակում դավաճանական բարքերի առկայության մասին տեղեկություններին։

Նա պնդեց՝ իրենք սրտացավությամբ են հետևում զինված ուժերի խնդիրներին և այդ հարցում պատրաստ են համագործակցել ցանկացածի հետ։

«Մենք մեր բանակի առաջամարտիկն ենք, մենք մեր բանակի մի մասն ենք։ Գնացեք, հարցրեք, թե ինչ սրտացավությամբ ենք մենք վերաբերվում Զինված ուժերի խնդիրներին։ Սատանայի հետ էլ կհամագործակցեմ, մենակ մեր բանակի համար լավ լինի, բայց 5-րդ շարասյան հետ չեմ համագործակցի»,- ընդգծեց նա։

 «Պետք է իրականության հետ վերջապես առերեսվելու կամք ունենանք, խոսքը հայոց պետականության մասին է, մեր պետականության լինելիության մասին  է, ու բանակը դրա կարևորագույն բաղկացուցիչն է։ Եթե բանակում կան խնդիրներ ու արատավոր երևույթներ, ու ընդդիմությանը կարելի է ամեն օր դրա մասին խոսել, նրանից է, որովհետև պահանջը կամ, գուցե, պատվերը դրա մասին է, որովհետև դա թուլացնում է մեր պետականության կենսունակությունը ու, այո՛, ովքեր թուլացնում են մեր պետականության կենսունակությունը, 5-րդ շարասյունը նրանց համար մեղմ է, դա ավելի շատ նման է դավաճանության», - Ազգային ժողովում հայտարարեց Պապիկյանը։

Նա նշեց՝ եթե Զինված ուժերում կան դավաճանական բարքեր, պետք է դրանք արմատախիլ արվեն։

«Պետք է անել համատեղ, բայց դա տանել նրան ու ասել՝ «ամբողջ բանակին ասում են դավաճան, ոչ մեկ չի ուզում զինվորական դառնալ», էդ մտածելակերպով հեռու մնացեք բանակից, մի՛ փչացրեք առկա մթնոլորտը»,- նշեց նա: