Արցախի նախկին պետնախարար, «Արցախի անվտանգության և զարգացման ճակատ» հանրային շարժման համակարգող Ռուբեն Վարդանյանը հարցազրույց է տվել «Дождь» հեռուստաընկերությանը՝ ներկայացնելով Արցախում ստեղծված ծանր իրավիճակն ու անդրադառնալով ՄԱԿ-ի Անվտանգության խորհրդում երեկվա քննարկմանը:

Խոսելով սովամահ եղած քաղաքացու մասին՝ Վարդանյանը նշել է․ «Մինչև սովամահության այս դեպքը այլ դեպքեր ևս եղել են: Երկու երեխաներ են մահացել այն պատճառով, որ նրանց մայրը գնացել էր ուտելիքի հետևից և ուշացել: Արդյոք մարդիկ պետք է մահանա՞ն, որ աշխարհը հասկանա, որ Արցախում սարսափելի աղետ է և զանգվածային մահեր պետք է լինե՞ն, որ աշխարհը արձագանքի  8-9 ամիս շարունակվող շրջափակմանը:

Ադրբեջանն ասում է՝ մենք պատրաստ ենք ապրանքներ մատակարարել: Ի՞նչ մթերքներ պետք է մատակարարվեն Ադրբեջանի կողմից, որ մարդիկ վստահ լինեն՝ դրանք թունավորված չեն, դրանք չեն հանգեցնելու ինչ-որ հիվանդությունների կամ այլ հետևանքների: Սա ողբերգություն է, որը միջազգային հանրությունն արհամարհում է:

Հարցին՝ ինչպիսի՞ ելք է տեսնում ստեղծված իրավիճակից, Վարդանյանը նշել է՝ մի քանի բան կա, որ պետք է անել։

«Առաջինը՝ միջազգային հանրության կողմից կոշտ պահանջ ներկայացվի Ադրբեջանին։ Պետք է ճնշում լինի պետությունների վրա, որ նրանք  էլ իրենց հերթին պատժամիջոցներ կիրառեն Ադրբեջանի իշխանությունների նկատմամբ։ Պետք է օդային միջանցք բացել և տարբեր միջոցներով՝ օդապարիկներ, դրոններ,  դեղորայք ու սնունդ  հասցնել այստեղ: Պետք է զանգվածային բողոք լինի մարդասիրական  կազմակերպությունների կողմից»։