Համաշխարհային աստղ Քիմ Քարդաշյանը դիմել է ԱՄՆ նախագահ Ջո Բայդենին։ Նա ֆեյսբուքյան իր էջում Եռաբլուր զինվորական պանթեոնից, Արցախից լուսանկարներ է հրապարակել և գրել․ «Խնդրանքս նախագահ Ջո Բայդենին, որպեսզի կանգնեցնի եւս մեկ Հայոց ցեղասպանությունը: Ժամանակն է, որ Ամերիկան (եւ աշխարհը) քայլեր ձեռնարկի հայերին Ադրբեջանից պաշտպանելու համար»։

Քիմ Քարդաշյանը և  Էրիկ Էսրաիլյանը գրում են Արցախի մասին rollingstone.com-ում, որը Hayastan.news-ը ներկայացնում է որոշակի կրճատումներով․

«Մենք Հայոց ցեղասպանությունը վերապրածների ժառանգներն ենք, և չենք ցանկանում ապագայում խոսել ևս մեկ ցեղասպանության ճանաչման կամ ոգեկոչման մասին: Անցյալ տարվա դեկտեմբերից Ադրբեջանը շրջափակել է Արցախի (նաև հայտնի որպես Լեռնային Ղարաբաղի) և մնացած աշխարհի բնիկ քրիստոնյա հայերի միջև միակ փրկօղակը։ Նրանք երկար տարիներ կախված են եղել Լաչինի միջանցքով սննդամթերքի, բժշկական պարագաների և մարդասիրական օգնության փոխադրումից: Ուկրաինական պատերազմը որոշ երկրների համար Ադրբեջանին դարձրել է ռուսական նավթի ու գազի առավել բարենպաստ այլընտրանք առաջարկող երկիր։ Այնուամենայնիվ, այս հույսը քաջալերել է ադրբեջանական ավտոկրատ կառավարությանը՝ սովը որպես զենք օգտագործել տարածաշրջանի հայ բնակչության դեմ: Այլևս ժամանակ չկա մտքերի, աղոթքների կամ անհանգստության համար:

2020 թվականի պատերազմը, այն բանից հետո, երբ Ադրբեջանը առանց սադրանքի հարձակվեց Արցախի հայերի վրա, երբեք չի ավարտվել աշխարհասփյուռ հայության գիտակցության մեջ։ Չնայած զինադադարի պայմանավորվածությանը, հայ զինվորների վրա հարձակումները եղել են մշտական և առանց հետևանքների։ Հայատյաց քաղաքականությունը նախագծվել և լայնորեն տարածվել է Ադրբեջանի կառավարության և այլոց կողմից: Տարածաշրջանային խաղաղությունը չպետք է ենթադրի զոհաբերել Արցախում հայերի ինքնիշխանությունը, բայց անկախ նրանից, թե ով է հավատում մեր կարծիքին, պարզ է, որ այս անողոք շրջափակումը հատել է մարդու իրավունքների և մարդասիրական իրավունքի բոլոր կարմիր գծերը։  

Արցախում ժողովուրդն ուզում է խաղաղ ապրել. Հիմա իսկական առաջնորդության ժամանակն է: Մեզ անհրաժեշտ է, որ նրանք, ովքեր բովանդակալից դեր ունեն այս գործում, անհապաղ պահանջեն բացել Լաչինի միջանցքը՝ դադարեցնելու հերթական ցեղասպանությունը։ Մենք ցանկանում ենք ավելի շատ ուշադրություն հրավիրել ճգնաժամի վրա և կոչ անել մեր կառավարության անդամներին, ովքեր իսկապես մտածում են մարդկության մասին, միջամտել: Միացյալ Նահանգներն ունի այդ հնարավորությունը»։